Uppbygging Landspítala við Hringbraut í Reykjavík er ein umfangsmesta innviðauppbygging sem farið hefur fram hér á landi. Heildarfjárfestingin dreifist yfir langt framkvæmdatímabil, en hún hófst árið 2010 og nær til ársins 2031 og fullfjármögnuð í gildandi fjármálaáætlun Alþingis. Stjórn Nýs Landspítala ohf. (NLSH) og stýrihópur um skipulag framkvæmda hefur kynnt heilbrigðisráðherra og fjármála- og efnahagsráðherra uppfærða heildaráætlun NLSH.

„Mikil uppbygging hefur átt sér stað við Hringbraut og nær allri ytri vinnu við nýjan meðferðarkjarna er lokið. Á annað ár er síðan innri vinna hófst í kjöllurum og á legudeildum á tveimur efstu hæðum hússins. Gert er ráð fyrir að byggingaframkvæmdum ljúki að mestu við nýjan meðferðarkjarna í árslok 2029. Samhliða verklokum hefst yfirfærslutími þannig að spítalinn geti hafið starfsemi með nýjum tækjakosti og búnaði. Unnið er nú þegar að skipulagningu flutninga með erlendum sérfræðingum. Gert er ráð fyrir að framkvæmdum við innanhússfrágang og tækjavæðingu í rannsóknahúsi ljúki á undan meðferðarkjarna. Undir Hringbrautarverkefni falla meðferðarkjarni, rannsóknahús, bílastæða- og tæknihús, bílakjallari og ýmis stofnkerfi. Auk þess gatna-, jarðvegs- og veituframkvæmdir og sjúkrahótel sem tekið var í notkun 2019,“ segir í tilkynningu frá heilbrigðisráðuneytinu.

Stefnt að verklokum við byggingu nýs Landspítala árið 2029