Faxaflóahafnir hafa nú á evrópska efnahgssvæðinu auglýst forval um þátttöku í lokuðu útboði á hönnun nýs Hafnarhúss við Viðeyjarsund í Sundahöfn. Þar er fyrirhugað að reisa nýjar höfuðstöðvar félagsins og sameina meginstarfsemi þess á einum stað. Ráðgert er að nýtt Hafnarhús verði um 3.000 fermetrar og hýsi skrifstofu- og þjónustustarfsemi Faxaflóahafna ásamt sérhæfðri vinnu- og verkstæðisaðstöðu. „Markmiðið er að skapa nútímalegt og sveigjanlegt starfsumhverfi sem eflir samstarf, styttir boðleiðir og styður við skilvirka og hagkvæma starfsemi til framtíðar,“ segir í tilkynningu.