Rætt við Sturlaug Haraldsson nýjan bæjarstjóra

Sturlaugur Haraldsson tók við nýju starfi sl. miðvikudag sem bæjarstjóri Akraneskaupstaðar og segist mæta fullur tilhlökkunar til leiks. Eftir áralanga reynslu úr atvinnulífinu, einkum sjávarútvegi, er hann kominn aftur á heimaslóðir og ætlar að leggja ríka áherslu á atvinnuuppbyggingu og að nýta þau fjölmörgu tækifæri sem hann telur felast á Akranesi. Blaðamaður Skessuhorns ræddi við Sturlaug um nýja starfið, heimkomuna, atvinnulífið og þann lærdóm sem hann tók með sér úr íþróttunum.

„Þetta nýja starf leggst mjög vel í mig. Það er í mörg horn að líta og margt að skoða,“ segir Sturlaugur þegar hann er spurður hvernig fyrstu skrefin í nýja starfinu leggist í hann. Hann er þó strax með ákveðin verkefni efst á blaði og þar skipar atvinnuuppbygging stóran sess. „Við munum leggja mikla áherslu á að byggja upp atvinnutækifæri og munum einhenda okkur í það á næstu vikum. Við erum mjög einbeitt í því að laða til okkar ný fyrirtæki.“ Sturlaugur telur Akranes vel í stakk búið til að taka á móti nýrri atvinnustarfsemi. Skipulögð atvinnusvæði séu til staðar og bærinn hafi margt fram að færa. „Hér býr harðduglegt og hæft fólk og vonandi verða einhverjar góðar fréttir á næstunni hvað þessa uppbyggingu varðar,“ segir hann.

**„Akranes er bær tækifæranna,“ segir Sturlaugur**

Snertir líf fólks frá vöggu til grafar

Starfsemi sveitarfélags er þó talsvert frábrugðin þeim fyrirtækjarekstri sem Sturlaugur þekkir hvað best. Verkefnin eru fjölbreytt og snerta nánast alla þætti daglegs lífs bæjarbúa. „Bærinn hefur með svo margt að gera og kemur nánast að lífi fólks frá vöggu til grafar. Þetta er mjög umfangsmikið en um leið mjög spennandi og áhugavert.“ Hann gerir sér jafnframt grein fyrir að fram undan geti verið krefjandi tímar. Efnahagsástandið sé ekki eins hagfellt og menn kysu og því þurfi að halda vel á spöðunum. „Við verðum að vera einbeitt og á tánum. En ég er alveg sannfærður um að það eru mörg tækifæri sem við getum gripið og við munum fara á fullt í að nýta þau.“

Liðsvinnan númer eitt, tvö og þrjú

Sturlaugur býr yfir víðtækri reynslu úr atvinnulífinu og hefur lengst af starfað innan sjávarútvegs. Þótt sveitarstjórnargeirinn sé að mörgu leyti annar heimur segir hann ákveðin grundvallarlögmál eiga við alls staðar þar sem fólk vinnur saman að sameiginlegum markmiðum. „Þegar kemur að rekstri og því að vinna með fólki eru þetta alltaf sömu lögmálin í sjálfu sér. Þar kemur liðsvinnan inn. Hún er númer eitt, tvö og þrjú.“

Hlýjar móttökur samstarfsfólks fyrsta daginn styrktu þá tilfinningu enn frekar. Sturlaugur segir starfsfólkið hafa tekið einstaklega vel á móti sér. Steinar Adolfsson, sem var starfandi bæjarstjóri, hafði undirbúið vistaskiptin mjög vel og Sigurður Páll, sem stýrir skipulags- og umhverfissviði, samdi meira að segja lag og texta í tilefni dagsins. „Ég var mjög þakklátur fyrir móttökurnar.“ Fyrstu kynni af samstarfsfólkinu gefa honum góða tilfinningu fyrir framhaldinu. „Ég er rosalega ánægður með starfsfólkið sem vinnur hérna. Við erum með öflugt lið og bæjarstjórnin er mjög vel mönnuð. Það er allt til staðar til þess að ná góðum árangri.“

Vonar að bæjarbúar leggist á árarnar

Þótt Sturlaugur sé kominn í leiðandi hlutverk leggur hann ríka áherslu á að uppbygging bæjarins sé ekki verkefni eins manns. Þar þurfi margir að leggjast á eitt. „Í rauninni þurfum við öll að koma að þessu. Ég vona að bæjarbúar leggist á árarnar með okkur. Það er margt sem þarf að líta til.“ Ólíkar skoðanir telur hann heldur ekki vera hindrun. Þvert á móti geti þær verið mikilvæg forsenda vandaðrar ákvarðanatöku. „Það er mjög mikilvægt að fá mismunandi sjónarhorn og mismunandi skoðanir. Það er bara hressandi og gerir það að verkum að ákvarðanatakan verður betri ef fólk er duglegt að skiptast á skoðunum.“

Ánægður að vera kominn heim

Það er sérstök tilfinning fyrir Sturlaug að takast á við nýja verkefnið á heimaslóðum eftir að hafa dvalið og starfað erlendis í meira en tvo áratugi. „Ég er ánægður með að vera kominn heim. Ég er búinn að vera erlendis í mörg ár og það er mjög gott að vera kominn aftur. Hér er frábært að búa og það er einstakt að fá tækifæri til þess að taka þátt í að móta nærumhverfið.“ Hann horfir ekki síst til þeirra möguleika sem felast í umhverfi Akraness og staðsetningu bæjarins. „Við búum í gríðarlega fallegu umhverfi hérna og við þurfum bara að sýna metnað í því að lyfta því upp.“

Áður en farið verði af krafti í markaðssetningu telur hann þó mikilvægt að styrkja ákveðna innviði og tryggja að varan sem kynna á standi undir væntingum og rúmlega það. „Ég hef meiri trú á því að hlutirnir séu fyrst til staðar, að við séum með einhvern grunn. Við þurfum til dæmis að vinna í hótelmálum og svo framvegis. Þegar grunnurinn hefur verið lagður kemur allt hitt.“ Hann segir litlu skila að leggja mikið undir í kynningu ef innviðirnir fylgja ekki með. „Það hefur ekki mikið upp á sig að vera með innantóm orð. Við sem búum hérna þekkjum auðvitað að við höfum upp á margt að bjóða nú þegar. Það mun hins vegar styrkja okkar stöðu verulega þegar við verðum búin að ganga frá ákveðnum hlutum og tengja þá saman. Ég hef trú á því að þetta sé allt innan seilingar“.

Uppeldið í íþróttunum dýrmætt veganesti

Sturlaugur á sér sterkar rætur í íþróttalífi Akraness og lék á sínum tíma knattspyrnu með ÍA. Hann segir þann bakgrunn hafa haft mikil áhrif á sig og vera dýrmætt veganesti inn í lífið og nú nýtt starf. „Ég fékk mjög gott uppeldi í gegnum íþróttirnar hérna á Akranesi og er mjög þakklátur fyrir það. Ég held að það hafi komið mér mjög vel.“ Hann telur öflugt íþróttastarf raunar vera eina af grunnstoðum bæjarfélagsins. „Íþróttastarfið á Akranesi er alveg sérlega öflugt. Það er einn af okkar helstu styrkleikum. Sama má segja um Tónlistarskólann okkar og leik- og grunnskólana. Þar er unnið starf sem er í fremstu röð. Þetta er gríðarlega mikilvægt fyrir uppeldi barnanna.

Á sama hátt má segja að þjónusta við eldri borgara sé einnig til fyrirmyndar. Fyrirhuguð stækkun á Dvalarheimilinu Höfða er mikið ánægjuefni. Þar er nánast verið að tala um tvöföldun á stærð heimilisins. Þörfin er brýn. Síðast en ekki síst verður að nefna sjúkrahúsið á Akranesi sem hlýtur að teljast vera einn allra mikilvægasti vinnustaður bæjarins. Allt eru þetta gimsteinar sem mikilvægt er að hlúa að.“

„Það er bara að sjá tækifærin“

Sturlaugur leynir því ekki að hann er spenntur fyrir því sem fram undan er. Hann vill sjá bæjarbúa, starfsfólk og kjörna fulltrúa vinna saman að því að efla Akranes og grípa þau tækifæri sem bjóðast. „Ég hlakka mjög til að takast á við þetta og vona svo sannarlega að sem flestir í bænum komi með okkur í að keyra hlutina áfram.“ Og lokaorðin eru einföld og lýsa vel þeirri nálgun sem hann hyggst taka með sér inn í nýja starfið: „Akranes er bær tækifæranna, þau liggja víða. Það er bara að sjá þau og keyra þau í gang.“