Einar Margeir Ágústsson úr Sundfélagi Akraness átti frábært Evrópumeistaramót í París dagana 10.–16. ágúst. Hann bætti sig í öllum þremur einstaklingsgreinum sínum og setti um leið þrjú Akranesmet. Í lok mótsins var hann einnig í íslensku boðsundsveitinni sem setti nýtt Íslandsmet í 4×100 metra fjórsundi.

Í öllum þremur einstaklingsgreinum sínum synti hann hraðar en áður og þar með féllu þrjú Akranesmet. Í 50 metra bringusundi synti hann á 27,77 sekúndum, bætti fyrra Akranesmet sitt um 0,13 sekúndur og hafnaði í 30. sæti. Í 100 metra bringusundi kom enn ein stór bæting. Einar synti á 1:00,87, bætti sig um 0,35 sekúndur og varð í 33. sæti. Mesta bætingin kom síðan í 200 metra bringusundi, þar sem hann synti á 2:15,16. Þar bætti hann sig um hvorki meira né minna en 0,84 sekúndur og hafnaði í 32. sæti.

„Þessi árangur sýnir vel þá miklu þróun sem orðið hefur hjá Einari undanfarin misseri. Hann hefur ítrekað verið að bæta sína bestu tíma og nálgast nú óðfluga Íslandsmetin í 50 og 100 metra bringusundi. Í 50m bringusund er hann í dag 0.31 í frá Islandsmetinu og 0.66 í 100m bringusundi,“ segir Kjell Wormdal yfirþjálfari hjá SA.

Íslandsmet í lok EM

Lokadagur Evrópumeistaramótsins gaf svo enn eitt stórt tilefni til að fagna. Einar synti með íslensku sveitinni í 4×100 metra fjórsundi, ásamt Guðmundi Leó Rafnssyni (ÍRB), Birni Frey Hálfdánarsyni (SH) og Símoni Elíasi Statkevicius (SH). Markmið sveitarinnar var skýrt; að bæta Íslandsmetið – og það tókst. Sveitin synti 0,72 sekúndum hraðar en fyrra Íslandsmet, sem er glæsilegur endapunktur á afar góðu móti fyrir íslenska sundfólkið. Einar Margeir var mjög ánægður með Evrópumeistaramótið og þann árangur sem náðist í París. Hann náði jafnframt þeim lágmörkum fyrir heimsmeistaramótið í Kína í desember.

Heldur áfram í Bandaríkjunum

Einar Margeir er nú farinn aftur til Bandaríkjanna þar sem hann stundar háskólanám og afreksæfingar. Hann hóf nám við University of South Carolina síðasta haust og heldur þar áfram að æfa og keppa samhliða verkefnum með íslenska landsliðinu. Næstu mánuðir verða því annasamir hjá þessum unga Skagamanni. Einar heldur áfram æfingum í Bandaríkjunum og undirbúningi fyrir næstu verkefni íslenska landsliðsins.

Einar Margeir með glæsilegan árangur á EM í París