Almyrkvi á sólu verður sjáanlegur frá Akranesi í dag og hefur Akraneskaupstaður gefið út sérstakar leiðbeiningar vegna rútuferða til bæjarins. Almyrkvinn mun vara í um eina mínútu og sjö sekúndur á Akranesi. Deildarmyrkvinn hefst kl. 16:46:49 en almyrkvinn sjálfur kl. 17:47:50.

Rútufyrirtæki sem hyggjast koma með gesti til Akraness þennan dag eru beðin um að tilkynna komu sína fyrir fram með tölvupósti á info@akranes.is. Er það gert til að auðvelda utanumhald og veita leiðbeiningar vegna umferðar og aðstöðu. Fjölmargir staðir á Akranesi henta vel til að fylgjast með sólmyrkvanum en sérstaklega er bent á Breiðina og Langasand, þar sem gott rými og útsýni er til himins.

Á Breiðinni verður Lambhúsastíg lokað fyrir umferð til að draga úr umferðaröngþveiti og lágmarka ljósmengun. Sérstakt svæði verður ætlað fyrir rútur og þaðan eru um 400 metrar eftir göngustíg að Akranesvita. Skúrinn við vitann verður opinn auk salerna. Íbúar sem ætla að fylgjast með myrkvanum við Akranesvita eru hvattir til að ganga eða hjóla á svæðið eða leggja við enda Vesturgötu eða Bíóhöll.

Við Langasand verður einstefna á Innnesvegi á kaflanum sem sjá má á meðfylgjandi mynd og þar verður hægt að leggja rútum.

Háflóð verður á Langasandi á meðan á sólmyrkvanum stendur, en hægt verður að fylgjast með af göngustígnum ofan við sandinn og æfingasvæðinu. Salerni verða opin í nýja íþróttahúsinu við Jaðarsbakka og við Guðlaugu.

Undirbúningur á Akranesi vegna rútuferða á almyrkvadag