Múgur og margmenni safnaðist saman við Langasand og víðar á Akranesi síðdegis í dag til að fylgjast með almyrkva á sólu. Þétt skýjahula setti þó strik í reikninginn og hvorki sást til sólar né hinnar tilkomumiklu kórónu hennar. Náttúran bauð engu að síður upp á sérstaka upplifun þegar skyndilega varð nær almyrkvað yfir bænum.

Deildarmyrkvinn hófst kl. 16:46:49 en lítið varð vart við hann enda alskýjað og engar sjáanlegar breytingar á himinhvelfingunni. Eftir því sem nær dró almyrkvanum fór þó að dimma og breytingin varð síðan afar hröð. Almyrkvinn hófst kl. 17:47:50 og á örskömmum tíma dimmdi gríðarlega yfir Akranesi. Fjöldi fólks hafði komið sér fyrir neðan Jaðarsbraut við Langasand og með fram strandlengjunni. Mikið var um bíla og gangandi vegfarendur á svæðinu og einnig hafði hópur fólks komið sér fyrir uppi á áhorfendastúkunni við ELKEM völlinn.

Þegar almyrkrið skall á varð snögg breyting á birtunni en vegna skýjanna sást ekkert til sjálfrar sólarinnar. Engin ljósadýrð eða kóróna varð sýnileg og sólmyrkvagleraugun komu því að litlum notum hjá þeim sem höfðu tekið þau með sér. Allt gerðist þetta á örskömmum tíma. Mynd sem tekin var kl. 17:48 sýnir myrkrið skömmu eftir að almyrkvinn hófst og önnur, tekin kl. 17:49, sýnir hversu dimmt var orðið. Aðeins um tveimur mínútum síðar, kl. 17:50, var farið að birta verulega á ný. Almyrkvinn varði því aðeins í rúma mínútu á Akranesi.

Þrátt fyrir að skýin hafi komið í veg fyrir þá sjón sem margir höfðu beðið eftir var stemningin sérstök. Þegar myrkrið skall skyndilega á mátti greinilega finna fyrir áhrifum þessa sjaldgæfa náttúrufyrirbæris og mannfjöldinn klappaði þegar almyrkvinn gekk yfir.

Veðrið olli þó eflaust vonbrigðum hjá mörgum á suðvesturhorni landsins og við Faxaflóa sem höfðu vonast til að sjá tunglið ganga fyrir sólina og kórónu hennar birtast á himni. Á Akranesi varð upplifunin þess í stað fyrst og fremst fólgin í hinum snöggu birtuskiptum; dagsbirtan hvarf nánast á augabragði og kom jafnskjótt aftur.

Mynd tekin kl. 17:49 frá sama sjónarhorni. Almyrkvinn varði einungis í rúma mínútu.

Fólk hafði komið sér fyrir ofan á áhorfendastúkunni á ELKEM vellinum til að sjá sjónarspilið, sem því miður varð ekki.

Dimmdi snögglega en skýin stálu sýningunni