Metnaðarfull áform eru uppi um uppbyggingu upplifunarmiðstöðvar við Eiðisvatn í landi Fellsenda í Hvalfjarðarsveit. Þar er gert ráð fyrir fornbílasafni, veitingarekstri, stórum veislusal, sýningarrýmum og fjölbreyttri afþreyingu á um 16 hektara svæði. Áformin voru kynnt á fundi um fyrirhugaða breytingu á aðalskipulagi Hvalfjarðarsveitar í stjórnsýsluhúsi sveitarfélagsins mánudaginn 10. ágúst sl. Um er að ræða annan áfanga af sex í skipulagsferlinu. Gunnar Þór Gunnarsson, ábúandi og eigandi Fellsenda ásamt eiginkonu sinni Ingu Guðrúnu Gísladóttur, kynnti hugmyndirnar, sem unnar hafa verið í samráði við sveitarfélagið.

Miðpunktur uppbyggingarinnar verður stór og sérstæð tveggja hæða bygging við Eiðisvatn. Gert er ráð fyrir að hún verði alls um 6.000–8.000 fermetrar, þar af verði grunnflötur um 3.400 fermetrar og kjallari um 1.500 fermetrar. Í kjallaranum verður meðal annars geymsla fyrir fornbíla og aðstaða til endurgerðar þeirra, sem áætlað er að geti skapað tvö til þrjú störf. Á jarðhæð verður sýningarsalur fyrir um 100 bíla auk móttöku, um 60 manna veitingastaður í klassískum amerískum „diner“-stíl og afþreyingarrými þar sem meðal annars verður boðið upp á pool og pílukast. Strax við innganginn á gestum að mæta eftirlíking af einum elsta bíl heims, frá árinu 1886, á snúningspalli. Gert er ráð fyrir að bílasýningin taki reglulegum breytingum.

Á efri hæð verður allt að 400 manna veislusalur með sviði og tæknibúnaði, ætlaður fyrir árshátíðir, ráðstefnur og aðra viðburði. Þaðan verður útsýni bæði yfir Eiðisvatn og niður í bílasafnið. Þá er gert ráð fyrir fimm sveigjanlegum sýningarrýmum sem nýta mætti undir tímabundnar lista- og menningarsýningar. Byggingin verður bogadregin og mikið gler verður á þeirri hlið sem snýr að Eiðisvatni til að nýta útsýnið sem hluta af upplifun gesta.

Útivist og stígakerfi hluti af áformunum

Uppbyggingin einskorðast ekki við bílasafnið. Hugmyndir eru um göngu-, reið- og hjólaleiðir milli Eiðisvatns og Akrafjalls, reiðhöll og aðra útivist. Þá er horft til þess að tengja svæðið betur við Álfsskóg og Akrafjall. Á fundinum var einnig farið yfir samskipti Hvalfjarðarsveitar og Vegagerðarinnar vegna fyrirhugaðrar uppbyggingar Vesturlandsvegar sem 2+1 vegar. Meðal þess sem hefur verið til skoðunar eru undirgöng undir Vesturlandsveg við Silungalæk sem gætu skapað örugga tengingu fyrir gangandi og hjólandi vegfarendur frá Eiðisvatni í átt að Álfsskógi og Akrafjalli.

Land Fellsenda er nú skilgreint sem landbúnaðarland í aðalskipulagi Hvalfjarðarsveitar og því þarf að breyta skipulaginu svo áformin geti orðið að veruleika. Svæðið er jafnframt innan skilgreinds varúðarsvæðis vegna iðnaðarstarfsemi á Grundartanga. Enn er um skipulagshugmyndir að ræða og ýmislegt getur tekið breytingum áður en endanleg útfærsla liggur fyrir. Markmiðið er þó að byggja upp nýjan áfangastað á Vesturlandi þar sem bílasaga, menning, veitingar, afþreying og útivist mætast.

Fundaraðsókn var góð.

Bílasafn, veislusalur og afþreying við Eiðisvatn