Dagskrá Hvalfjarðardaga, sem fram fara dagana 13.–16. ágúst, hefur verið kynnt. Fram undan er fjölbreytt hátíðarhelgi þar sem íbúum og gestum býðst að taka þátt í fjölda viðburða víðs vegar um Hvalfjarðarsveit.

Á dagskránni er meðal annars litahlaup á vegum Ungmenna- og íþróttafélags Hvalfjarðarsveitar, heimatónleikar í Skipanesi, útitónleikar með Hreimi og Vigni Snæ í Álfholtsskógi, stærsta hindrunarbraut landsins á Vinavelli, sýning Leikhópsins Lottu á Litalandi, BMX-sýningar og listarúntur. Nánar um dagskrána má finna á baksíðu blaðsins í dag.

Þess má geta að að þessu sinni verða Hvalfjarðardagar í sérstökum afmælisbúningi þar sem Hvalfjarðarsveit fagnar 20 ára afmæli sínu. Af því tilefni verða haldnir afmælistónleikar í Hallgrímskirkju í Saurbæ þar sem meðal annars verður frumflutt sérsamið afmælislag sveitarfélagsins. Þá mun Haraldur Benediktsson, oddviti sveitarstjórnar, flytja erindi um sögu Hvalfjarðarsveitar í Miðgarði. Íbúar eru jafnframt hvattir til að skreyta heimili sín í rauðum og hvítum litum yfir hátíðarhelgina. Meðfylgjandi myndir eru frá Hvalfjarðardögum á síðasta ári.

Búist er við fjölmenni í ár þar sem sveitarfélagið fagnar 20 ára afmæli.

Hvalfjarðardagar fram undan með fjölbreyttri dagskrá