Margir bíða spenntir eftir opnun

Stefnt er að því að nýjar rennibrautir við sundlaugina í Íþróttamiðstöðinni í Borgarnesi verði teknar í notkun síðar í þessum mánuði. Brautirnar hafa verið lokaðar frá miðjum maí á meðan unnið hefur verið að endurnýjun þeirra, en framkvæmdir hafa tafist bæði vegna anna hjá verktaka og tafa sem komu upp hjá Altís, sem sjá um að dúkleggja stigahúsið að rennibrautunum. Dúkurinn er hins vegar nýkominn til landsins og er gert ráð fyrir að vinna við stigaþrep hefjist á mánudaginn næsta. Að sögn Páls Guðmundar Ásgeirssonar, forstöðumanns íþróttamannvirkja í Borgarbyggð var gamla rennibrautin orðin úr sér gengin og því ákveðið að setja upp nýjar brautir í hennar stað. „Verkinu er nú að mestu lokið og við stefnum að því að opna rennibrautirnar síðar í mánuðinum. Við ætlum jafnframt að gera eitthvað skemmtilegt fyrir gesti á opnunardeginum og munum auglýsa það nánar þegar nær dregur,“ segir Páll.

Mikið aðdráttarafl

Lokun rennibrautanna hefur ekki farið fram hjá sundlaugargestum. Páll segir marga hafa beðið óþreyjufulla eftir opnuninni enda séu brautirnar einn vinsælasti hluti sundlaugarinnar. „Það er alveg eðlilegt að fólk sé svekkt. Á hverjum degi eru einhverjir sem hætta við að fara í sund þegar þeir sjá að brautirnar eru ekki komnar í gagnið. Sömuleiðis vitum við að einhverjir leggja ekki af stað vegna þess að þeir vita að brautirnar eru lokaðar, þó erfitt sé að meta hversu margir það eru,“ segir hann.

Fjölmargar umbætur

Þrátt fyrir lokun rennibrautanna hefur ýmislegt verið gert til að bæta aðstöðuna við sundlaugina. Á síðustu misserum hefur meðal annars verið opnuð ný sána, búningsklefar verið endurbættir, ný líkamsræktartæki tekin í notkun og ráðist í ýmis viðhaldsverk á útisvæðinu. Páll segir einnig að mikil eftirvænting sé eftir nýrri upphitaðri fótboltahöll sem opnuð verður síðar í mánuðinum. „Nýja höllin mun gjörbreyta aðstöðu til knattspyrnuiðkunar hér á svæðinu. Það er margt spennandi að gerast í Borgarnesi um þessar mundir og við hvetjum fólk til að kíkja til okkar, skoða breytingarnar og njóta aðstöðunnar þegar allt verður tilbúið,“ segir Páll Guðmundur Ásgeirsson.

Margir bíða spenntir eftir opnun rennibrautanna.

Seinkun á opnun nýrrar rennibrautar í sundlauginni í Borgarnesi