Ný snertilaus bílaþvottastöð Löðurs við Brúartorg 6 í Borgarnesi hefur nú opnað fyrir viðskiptavini. Unnið hefur verið að framkvæmdinni í rúmt ár en samkvæmt upplýsingum frá Alfreð Ari Chiarolanzio, rekstrarstjóra Löðurs, hefur verkefnið tekið lengri tíma en upphaflega var áætlað, meðal annars vegna uppsetningar nýrrar spennistöðvar og rafmagnstenginga.

Löður býður upp á umhverfisvænni bílaþvott og þar sem framkvæmd af þessu tagi hefur ekki áður verið unnin á svæðinu var enn meiri áhersla lögð á að tryggja að allar öryggiskröfur og staðlar væru uppfylltir í samstarfi við eftirlitsnefndir í sveitarfélaginu.

Stöðin er hefðbundin snertilaus sjálfvirk bílaþvottastöð þar sem ökumenn aka sjálfir inn í þvottastöðina hvenær sem er sólarhringsins. Bílnum er ekið rólega inn í þvottastöðina þar til að ökumaður fær skilaboð um að stoppa og er bíllinn þá settur í park gír. Ökumaður situr í bílnum á meðan þvottur er í gangi og slakar á. Greitt er áður en ekið er inn í stöðina en hægt er að nýta áskriftarleiðina á þessari stöð.

Bílaþvottastöðvar Löðurs eru opnar allan sólarhringinn og bjóða upp á snertilausan háþrýstiþvott með sérvöldum þvottaefnum. Greiða má með helstu greiðslukortum, Apple Pay, Google Pay, Parka eða Löður-appinu. Í Parka appinu nýtist myndavélabúnaður til að lesa bílnúmer ökutækja sem eru í áskrift og sér Parka um sjálfvirka greiðslu. Löður leggur jafnframt áherslu á umhverfisvænan rekstur. Á öllum stöðvum fyrirtækisins eru olíu- og sandskiljur sem koma í veg fyrir að olía og önnur spilliefni berist út í fráveitukerfið og grunnvatn. Samkvæmt fyrirtækinu er einnig notað minna vatn í þvottastöðvum en við hefðbundinn bílaþvott á þvottaplani.

Ný bílaþvottastöð Löðurs opnaði í dag í Borgarnesi