Sjónarhóll Trail Run verður haldið í fyrsta sinn á Hellissandi laugardaginn 8. ágúst. Að hlaupinu standa Ari Bent Ómarsson og Helga Jóhannsdóttir fyrir hönd Hlaupahóps Snæfellsbæjar, en þau hafa undanfarna mánuði unnið að undirbúningi þessa nýja utanvega hlaups.

Hlaupið hefst við Útgerðina á Hellissandi klukkan 12 og liggur 21 kílómetra leið um Prestahraun og Eysteinsdalsleið upp á Sjónarhól, gamlan eldgíg innan Snæfellsjökulsþjóðgarðs, áður en hlaupið er til baka á Hellissand. Á leiðinni er um 457 metra samanlögð hækkun og er gert ráð fyrir að fyrstu keppendur komi í mark um 90 mínútum eftir ræsingu. Skipuleggjendur segja hlaupið henta jafnt byrjendum sem reyndum utanvega hlaupurum. Leiðin liggur um fjölbreytt landslag, að mestu malarvegi en einnig graslendi og hraun, og býður upp á einstaka náttúruupplifun í skjóli Snæfellsjökuls.

Veitt verða verðlaun fyrir þrjú efstu sætin í karla- og kvennaflokki og allir sem ljúka hlaupinu eiga jafnframt möguleika á veglegum útdráttarverðlaunum. Hlaupið gefur einnig ITRA-stig fyrir utanvega hlaupara. Keppendur fá meðal annars tímatöku, brautarvörslu, drykkjarstöðvar, buff með merki hlaupsins, grill að hlaupi loknu og frían aðgang að sundlaug Snæfellsbæjar í Ólafsvík á keppnisdegi. Skipuleggjendur hvetja íbúa og gesti til að leggja leið sína á Hellissand um helgina, fylgjast með hlaupinu og taka vel á móti keppendum þegar þeir koma í mark. Það sé von þeirra að Sjónarhóll Trail Run verði árlegur viðburður og festi sig í sessi sem hluti af íþrótta- og útivistarlífi Snæfellsness.

Hlaupið fer fram í hinu fallega landslagi Snæfellsjökulsþjóðgarðs.

Nýtt utanvegahlaup þreytt á Hellissandi um helgina