Hvalfjarðarsveit hefur á heimasíðu sinni minnt á kynningarfund um aðalskipulagsbreytingu á jörðinni Fellsenda. Fundurinn verður haldinn í í stjórnsýsluhúsi Hvalfjarðarsveitar að Innrimel 3 mánudaginn 10. ágúst nk. og hefst kl. 17.

Breytingin felst í upplifunarmiðstöð þar sem fornbílasafn er miðpunktur auk annarrar þjónustu, s.s. veitingareksturs, gistingar og fjölbreyttrar afþreyingar, á um 16 ha svæði. Jafnframt er gert ráð fyrir göngu-, reið og hjólaleið milli Eiðisvatns og Akrafjalls. Landið er skilgreint sem landbúnaðarland í aðalskipulagi Hvalfjarðarsveitar en er innan varúðarsvæðis stóriðjuveranna á Grundartanga. Varúðarsvæði á við um þau svæði sem áður voru nefnd þynningarsvæði, þ.e. svæði þar sem hætta getur stafað af starfsemi sem getur haft áhrif á heilsu og öryggi almennings. Á Grundartanga eru tvö slík svæði, annað vegna flúors og hitt vegna brennisteinsdíoxíðs.

Eigendur jarðarinnar Fellsenda eru hjónin Gunnar Þór Gunnarsson og Inga Guðrún Gísladóttir. Í samtali við Skessuhorn í janúar á þessu ári sagði Gunnar Þór að gert væri ráð fyrir tveggja hæða byggingu með kjallara að hluta. Grunnflötur byggingarinnar verður um 3.400 fermetrar og reiknað er með að byggingin í heild verði 6.000-8.000 fermetrar að stærð. Þar er gert ráð fyrir sýningarsal fyrir allt að 100 bíla auk veislusalar þar sem allt að 400 manns geta komið saman. Þá verður þar einnig um 60 manna matsölustaður í „diner“ stíl auk afþreyingarsala þar sem hægt er að skemmta sér við pool og pílukast svo eitthvað sé nefnt.

Framkvæmdin kallar á breytingu á aðalskipulaginu þar sem skilgreint verður nýtt verslunar- og þjónustusvæði og gert ráð fyrir nýrri göngu-, reið og hjólaleið. Samhliða breytingunni er unnið deiliskipulag fyrir svæðið og sameiginleg umhverfismatsskýrsla fyrir bæði verkefnin. – Kynningartími tillögunnar er frá 8. júlí–19. ágúst 2026.

Fundur um upplifunarmiðstöð og fornbílasafn á Fellsenda í Hvalfjarðarsveit