„Það var mikið af fiski í Þverá þegar við voru þar fyrir fáum dögum að veiða; flott vatn og mikið af fiski,“ sagði Skúli Sigurz Kristjánsson í samtali við Skessuhorn. Með honum við veiðar var Sólon Welding og þeir veiddu vel í túrnum. „Sumir hylirnir voru stappfullir af laxi en við fengum 13 laxa á stöngina okkar,“ sagði Skúli. Veiðimenn sem veitt hafa í Þverá og Kjarará segja mikið af fiski, en áin hefur nú gefið 1.255 laxa en næst í röðinni er Norðurá í Borgarfirði með 540 laxa og Miðfjarðará er í þriðja sæti með 450 laxa.