Tvennir síðustu tónleikarnir í Sumartónleikaröðinni í Hallgrímskirkju verða sunnudaginn 26. júlí og sunnudaginn 2. ágúst kl. 16.00. Á fyrri tónleikunum eru það tvær ungar og upprennandi listakonur sem flytja glæsilega efnisskrá; María Qing Sigríðardóttir, selló og Ásta Dóra Finnsdóttir, píanó. Þær hafa nú þegar getið sér gott orð fyrir leik sinn; þær hafa leikið einleik með sinfóníuhljómsveitum og haldið fjölbreytta tónleika hér heima og erlendis. Þær leika verk eftir Chopin og Beethoven og einnig glæsilega tangótónlist og spænska tónlist.