Neyðarlínan hvetur almenning til að vista símanúmerið 599 0112 í farsíma sínum sem varaleið ef ekki tekst að ná sambandi við neyðarnúmerið 112 eða ef símtal rofnar eða einkennist af slæmum hljóðgæðum. „Áréttað er að alltaf á að reyna fyrst að hringja í 112. Varanúmerið 599-0112 er eingöngu ætlað til notkunar ef ekki tekst að tengjast 112 eða ef gæði símtals gera samskipti ómöguleg,“ segir í tilkynningu. „Símtöl í varanúmerið eru meðhöndluð eins og almenn símtöl. Þau njóta því ekki sama forgangs í símkerfinu og símtöl í 112 og senda ekki sjálfkrafa staðsetningarupplýsingar til Neyðarlínunnar.

„Farsímafélögin á Íslandi hafa nýlega lokið við lokun eldri 2G- og 3G - farsímakerfa og reiðir sig nú alfarið á 4G- og 5G-innviði. Þótt breytingarnar hafi almennt gengið vel geta þær haft áhrif á tengingu sumra farsíma. Í þeim tilvikum getur meðal annars komið upp að; ekki tekst að tengjast 112, hljóðgæði í símtali eru slæm eða trufluð og símtal rofnar óvænt. Fjarskiptastofa, íslensku farsímafyrirtækin og Neyðarlínan vinna nú sameiginlega að því að greina og leysa þessi tilvik eins hratt og kostur er.“

Nánari upplýsingar má finna á https://www.112.is/mikilvaegar-upplysingar-vardandi-simtol-i-112