Tónlistarhátíðin Heima í Hólmi var haldin í þriðja sinn í Stykkishólmi dagana 10. og 11. júlí. Hjördís Pálsdóttir hefur staðið fyrir hátíðinni frá upphafi og lagt áherslu á að skapa notalega tónlistarupplifun þar sem heimafólk og gestir geta notið fjölbreyttrar dagskrár í fallegu umhverfi bæjarins. Eitt af sérkennum hátíðarinnar er að tónleikarnir fara fram í görðum og á pöllum heimafólks víðs vegar um bæinn og skapa þannig einstaka og nána stemningu. Vegna óhagstæðrar veðurspár voru tónleikar laugardagskvöldsins þó færðir inn.