Rætt við Bjarka Þorsteinsson sveitarstjóra í Hvalfjarðarsveit

Borgnesingurinn Bjarki Þorsteinsson tók fyrr í sumar við starfi sveitarstjóra Hvalfjarðarsveitar. Líkt og með aðra nýja bæjar- og sveitarstjóra í landshlutanum fékk Skessuhorn að fræðast aðeins um manninn.

Fyrst er Bjarki spurður um uppruna, fjölskyldu og fyrri störf. „Ég er fæddur og uppalinn í Borgarnesi og hef lengst af búið þar ásamt eiginkonu minni Guðrúnu Ólafsdóttir sem starfar við bókhald. Við Guðrún höfum fylgst að síðan við vorum samferða í Fjölbrautaskólanum á Akranesi á sínum tíma, sennilega hægt að segja frá níunda áratug síðustu aldar. Við eigum saman fjögur uppkomin börn og barnabörnin, sem nú eru orðin fimm talsins, eru orðin stór og mikilvægur hluti af lífi okkar. Fjölskyldan, útivist ýmis konar og samfélagsmál hafa alltaf skipað stóran sess hjá mér og svo er ég áhugamaður um íþróttir og gallharður stuðningsmaður Manchester City í enska boltanum síðustu 50 árin að verða,“ segir Bjarki.

Á síðasta kjörtímabili gegndi Bjarki starfi sveitarstjóra í Dalabyggð. „Þar áður starfaði ég í 15 ár sem framkvæmdastjóri Brákarhlíðar í Borgarnesi. Samhliða því tók ég virkan þátt í hagsmunagæslu velferðarþjónustunnar og sat í forystusveit Samtaka fyrirtækja í velferðarþjónustu. Þar áður starfaði ég um árabil við verslunarstörf. Einnig sat ég í 16 ár í sveitarstjórn Borgarbyggðar. Þessi fjölbreytta starfsreynsla hefur kennt mér mikilvægi góðrar þjónustu, ábyrgrar fjármálastjórnar og ekki síst mikilvægi góðra samskipta manna á milli.“

Nú varstu eitt kjörtímabil sveitarstjóri í Dalabyggð. Hvernig var reynslan af því? „Tíminn í Dalabyggð var bæði krefjandi en um leið afar gefandi. Ég er þakklátur fyrir það traust sem mér var sýnt af þáverandi sveitarstjórn og það góða samstarf sem ég átti við starfsfólk sveitarfélagsins, kjörna fulltrúa og íbúa. Á þessum árum í Dölunum var ráðist í mörg mikilvæg verkefni, þar á meðal uppbyggingu nýrrar íþróttamiðstöðvar, auk þess sem unnið var markvisst að eflingu innviða, þjónustu og fjárhags sveitarfélagsins til að unnt væri að ráðast í framkvæmdir við íþróttamannvirkin. Slík verkefni kenna manni mikilvægi góðrar áætlanagerðar, opinnar stjórnsýslu og þess að byggja upp traust og samvinnu. Ég er fullviss um að sú reynsla sem ég hef öðlast muni nýtast mér vel í Hvalfjarðarsveit. Þótt hvert sveitarfélag sé einstakt á sinn hátt eru grunnverkefnin þau sömu; að hlusta á íbúana, forgangsraða skynsamlega og skapa öflugt samstarf milli kjörinna fulltrúa, starfsfólks og samfélagsins.“

En hvernig er staðan í Hvalfjarðarsveit og hver verða helstu verkefnin til að byrja með? „Ég hef nú hafið störf eftir smá frí og er fullur tilhlökkunar og finn strax fyrir metnaði og jákvæðum anda innan sveitarfélagsins og samstarfsfólks í stjórnsýslunni. Fyrstu vikurnar núna snúast fyrst og fremst um að kynnast starfseminni enn betur, starfsfólkinu, sveitarstjórninni og þeim spennandi verkefnum sem eru fram undan. Hvalfjarðarsveit er öflugt sveitarfélag með mikla möguleika. Áhersla mín verður á að byggja áfram á þeim góða grunni sem fyrir er, tryggja öfluga þjónustu við íbúa, viðhalda ábyrgri fjármálastjórn og styðja við áframhaldandi uppbyggingu samfélagsins. Ég legg jafnframt ríka áherslu á gott samtal, gagnsæi og samvinnu, enda tel ég að þannig náist bestur árangur.“

Bjarki segist þakklátur fyrir það traust sem honum var sýnt og hlakkar til að vinna með íbúum, starfsfólki og sveitarstjórn að farsælli framtíð Hvalfjarðarsveitar. „Eins og fyrr sagði þá hef ég lengi haft mikinn áhuga á samfélagsmálum og samfélagsuppbyggingu og því hvernig öflug sveitarfélög geta skapað fólki góð lífsgæði, það er minn hvati hér í Hvalfjarðarsveit líkt og bæði í Dalabyggð og Borgarbyggð áður og vonandi smitar sá metnaður minn inn í störf mín og samstarf hér í Hvalfjarðarsveit, samfélaginu öllu til heilla,“ segir Bjarki Þorsteinsson að lokum.

Fyrri störf og reynsla mun nýtast

Rætt við Bjarka Þorsteinsson sveitarstjóra í Hvalfjarðarsveit

Rætt við Bjarka Þorsteinsson sveitarstjóra í Hvalfjarðarsveit