Vinnuskólinn í Grundarfirði hefur verið starfræktur síðustu vikur þar sem nemendur sem voru að klára sjöunda til tíunda bekk í grunnskóla sinntu hinum ýmsu störfum undir dyggri leiðsögn leiðbeinanda. Krakkarnir hafa verið mjög duglegir og hreinsað og snyrt bæinn ásamt öðrum störfum. Síðasta mánudag hófst síðasta vikan þetta árið og þá heimsóttu krakkarnir Slökkvilið Grundarfjarðar og kynntu sér starfsemina þar. Að sjálfsögðu voru brunaslöngurnar þrýstiprófaðar og voru ófáir sem blotnuðu hressilega eftir hamaganginn.