Sem liður í verkefninu Gott að eldast hefur Hvalfjarðarsveit stigið mikilvægt skref með stofnun svokallaðs Móma-teymis, en það stendur fyrir móttöku- og matsteymi. Teymið mun fara yfir allar umsóknir sem berast um félagslega heimaþjónustu og heimahjúkrun í sveitarfélaginu. Í teyminu eiga sæti fulltrúar frá velferðar- og fræðsludeild Hvalfjarðarsveitar, Heilbrigðisstofnun Vesturlands (HVE), hjúkrunarheimilinu Höfða ásamt iðjuþjálfa frá SSV. Með þessu er stigið skref í átt að samþættri og samfelldri þjónustu við eldra fólk.