Jónas Kári Eiríksson, framkvæmdastjóri vörustýringar hjá Öskju, er á meðal 20 vonarstjarna í íslensku viðskiptalífi

Jónas Kári Eiríksson, framkvæmdastjóri vörustýringar hjá Öskju, er einn þeirra tuttugu einstaklinga sem ráðgjafafyrirtækið Góð samskipti valdi nýverið á lista yfir vonarstjörnur í íslensku viðskiptalífi árið 2026. Á listanum eru efnilegir stjórnendur sem taldir eru líklegir til að skipa sér síðar á hinn þekkta 40 undir 40 lista fyrirtækisins. „Vonarstjörnur eru valdar úr hópi ábendinga frá reyndu fólki í atvinnulífinu. Allt einstaklingar sem miklar væntingar eru bundnar við á næstu árum og hafa vakið athygli fyrir hæfileika og metnað. Sumir þeirra stýra nú þegar stórum einingum með fjölda millistjórnenda og starfsmanna, en aðrir eru komnir með ábyrgð umfram formlegan starfstitil eða mannaforráð,“ segir í grein Góðra samskipta á Medium. Jónas, sem er fæddur og uppalinn á Akranesi, segist hafa orðið bæði hissa og þakklátur þegar hann frétti af tilnefningunni.

„Þetta kom mér algjörlega á óvart. Ég vissi ekkert af þessu fyrr en endurskoðandinn okkar sendi mér skilaboð og óskaði mér til hamingju. Þá þurfti ég sjálfur að fara að kynna mér hvað væri í gangi. Það var mikill heiður að vera valinn úr hópi aðeins tuttugu einstaklinga,“ segir hann í samtali við Skessuhorn. Hann segir viðurkenninguna þó ekki fyrst og fremst snúast um sjálfan sig. „Enginn nær svona árangri einn. Þetta er hrós á allt fólkið sem ég vinn með á hverjum degi. Ég hef verið einstaklega heppinn með samstarfsfólk og leiðbeinendur, ekki síst Jón Trausta, forstjóra Öskju og Inchcape á Íslandi, sem hefur verið minn mentor. Þetta er árangur okkar allra,“ segir Jónas Kári, en þess má geta að Jón Trausti Ólafsson er Skagamaður líkt og Jónas Kári, og viðskiptafræðingur frá Háskólanum á Bifröst.

**Askja er m.a. með umboð fyrir Mercedes Benz**

Byrjaði að þrífa bíla hjá Öskju

Jónas hóf störf hjá Öskju árið 2014 við að þrífa bíla. Þá störfuðu um 70 manns hjá fyrirtækinu en í dag eru þeir um 260. Á þessum tíma hefur fyrirtækið vaxið hratt með fjárfestingum í nýjum fyrirtækjum og vörumerkjum – og er í dag orðið hluti af alþjóðlega samstæðufélaginu Inchcape. „Þegar ég fékk núverandi starf var ég aðeins 26 ára, ekki einu sinni búinn með háskólanámið og ekki búinn að ljúka BS-prófi. Mér var treyst fyrir innkaupum upp á tíu til ellefu milljarða króna á ári og þegar ég lít til baka finnst mér það hreint ótrúlegt.“

Í dag situr hann í framkvæmdastjórn Öskju sem og Inchcape á Íslandi og kemur að stefnumótun samstæðunnar ásamt forstjóra fyrirtækisins og fleira góðu fólki. „Vörustýring snýst um allt það sem gerist áður en vara er seld. Við berum ábyrgð á samskiptum við birgja, innkaupum, markaðsgreiningum og því að velja hvaða vörur henta íslenskum markaði auk fjölda annarra verkefna. Þetta er fjölbreytt og síbreytilegt starf.“

**Jónas Kári, Rakel Rósa og Ragnheiður Marey á skíðum í Austurríki**

Jafnvægi milli fjölskyldu og vinnu skiptir máli

Jónas segir að þrátt fyrir annasamt starf sé mikilvægt að gleyma ekki því sem skiptir mestu máli. Hann og eiginkona hans, Rakel Rósa Þorsteinsdóttir, eiga tvö ung börn og reyna markvisst að skapa jafnvægi milli vinnu og fjölskyldulífs. „Það eru kannski bara tveir eða þrír tímar á dag sem við höfum öll saman, þannig að ég reyni að skilja vinnuna eftir þegar ég kem heim. Ég vil vera til staðar fyrir fjölskylduna og börnin meðan þau eru vakandi. Vinnan getur beðið þar til þau eru sofnuð.“ Útivist er stór þáttur í því að hlaða batteríin. Fjölskyldan fer gjarnan á skíði yfir vetrarmánuðina en Jónas sækir einnig mikið í fluguveiði.

„Veiðin snýst ekki endilega um aflann heldur kyrrðina og náttúruna. Þar næ ég að endurhlaða mig. Ég fer ekki endilega til að veiða sem flesta fiska heldur til að njóta kyrrðarinnar. Ég fer stundum bara með stelpuna mína upp í Meðalfellsvatn. Þetta þarf ekki að vera flókið. Það verður seint sagt um mig að ég sé fengsæll veiðimaður,“ segir Jónas og hlær. „Það sama gildir um skíðaferðirnar; þar er maður ekki stöðugt í símanum og það er einmitt hluti af sjarmanum. Þetta jafnvægi skiptir miklu máli.“ Hann segir jafnframt að vinnusemi skipti vissulega máli, en hún má ekki vera á kostnað fjölskyldunnar. „Ég trúi því að maður þurfi að vera tilbúinn að leggja hart að sér þegar þess þarf, en jafnframt að kunna að vera til staðar fyrir sína nánustu. Til lengri tíma skilar það bæði betri líðan og betri árangri,“ segir Jónas Kári.

Akranes á fullt erindi á landssviðið

Jónas bendir á að fleiri Skagamenn hafi verið á listum Góðra samskipta, eða sex talsins sem er 10% af öllum nöfnunum, en það er býsna hátt hlutfall Skagamanna á listanum. Jónas Kári segir það sýna að öflugt atvinnulíf sé að þróast á Akranesi, þó svo að það séu ekki allir að vinna þar. „Við eigum það stundum til að tala bæinn okkar niður, en ég vil frekar tala hann upp. Það er gaman að sjá hversu margir Skagamenn eru að ná langt í íslensku atvinnulífi. Við eigum fullt erindi á landssviðið og það er ástæða til að vera stolt af því.“

Að lokum segir hann að vinnusemi og þjónustulund hafi fylgt sér allt frá unglingsárunum þegar hann hóf störf í Grundavali, núna Krambúðinni, sem reyndar er verið að loka fyrir fullt og allt. „Ég lærði snemma að taka alltaf auka skrefið og vera tilbúinn að hlaupa undir bagga. Það hefur reynst mér vel að fara tvær mílur þegar ég á bara að fara eina. Oft kemur árangurinn ekki strax, en á endanum skilar þjónustulund, metnaður og dugnaður sér,“ segir Jónas að lokum.

**Sjóbirtingur úr Eldvatni í Meðalfellslandi**

**Hluti af vinnu Jónasar Kára er að fylgjast með tækninýjungum og sækja sýningar erlendis**

Það er alltaf gaman þegar eftir vinnunni er tekið

Jónas Kári Eiríksson, framkvæmdastjóri vörustýringar hjá Öskju, er á meðal 20 vonarstjarna í íslensku viðskiptalífi

Jónas Kári Eiríksson, framkvæmdastjóri vörustýringar hjá Öskju, er á meðal 20 vonarstjarna í íslensku viðskiptalífi