Listahjón og hugmyndasmiðir flytja af mölinni í sveitasæluna

Fyrir tæpu ári ákváðu listahjónin Matthías Tryggvi Haraldsson og Brynhildur Karlsdóttir að yfirgefa ys og þys höfuðborgarinnar og flytja ásamt dætrum sínum tveimur í Hvalfjarðarsveit. Þar hafa þau fundið kyrrðina sem þau leituðu að, byggt sér nýtt heimili og skapað umhverfi sem þau telja henta bæði fjölskyldulífinu og skapandi störfum. Þau eru bæði útskrifuð með BA-próf af sviðshöfundabraut Listaháskóla Íslands og hafa getið sér gott orð á sviði leiklistar og tónlistar.

Brynhildur vakti fyrst athygli með hljómsveitinni Hórmónum sem sigraði í Músíktilraunum. Síðar hlaut hljómsveitin Kvikindi, sem hún var hluti af, Íslensku tónlistarverðlaunin þegar platan Ungfrú Ísland var valin plata ársins. Hún var einnig meðal stofnenda Hatara sem hlaut fjölda viðurkenninga á Íslensku tónlistarverðlaununum, meðal annars sem flytjandi ársins. Matthías hefur um árabil verið þekktur sem leikskáld, sviðshöfundur og einn af forsprökkum hljómsveitarinnar Hatara. Hann hefur skrifað fjölda leikrita sem hafa verið sýnd í Þjóðleikhúsinu, Borgarleikhúsinu og hjá sjálfstæðum leikhópum hér á landi, auk þess sem verk hans hafa verið þýdd og sett upp erlendis. Hann hlaut Grímuverðlaunin þegar leikrit hans Síðustu dagar Sæunnar var valið leikrit ársins. Um þessar mundir starfar hann sem handritshöfundur og vinnur að kvikmynd í samstarfi við leikstjórann Baldvin Z.

Í dag starfar Matthías sem sjálfstæður hugmyndasmiður og textahöfundur, en Brynhildur sinnir tónlistinni af fullum krafti, kennir söng og vinnur að fjölbreyttum verkefnum í heimabyggð. Þau segja ákvörðunina um að flytja úr borginni hafa tekið tíma, en þegar rétti staðurinn fannst hafi þau ekki hikað. „Þegar við byrjuðum að búa vorum við sannfærð um að Reykjavík 101 væri miðja alheimsins,“ segir Matthías og brosir. „Síðan eignuðumst við börn og þá breyttist forgangsröðunin. Okkur langaði í meira pláss, meiri kyrrð og að börnin fengju að alast upp nær náttúrunni.“ Brynhildur segir að draumurinn um sveitalíf hafi lengi blundað í sér. „Það tók Matthías svolítinn tíma að átta sig á því að ég meinti þetta í fullri alvöru. Við skoðuðum fjölda eigna á tveggja ára tímabili áður en við fundum staðinn sem við töldum vera hinn rétta.“ Í dag segjast þau ekki sjá eftir ákvörðuninni. „Við sjáum hvað stelpunum okkar líður vel hér. Það eitt segir okkur að við höfum valið rétt.“

**Hjónakornin hafa komið sér vel fyrir í sveitinni**

Sköpunin nýtur sín betur í kyrrðinni

Flutningurinn hafði einnig áhrif á starfsferil Matthíasar. Eftir að hafa starfað meðal annars hjá auglýsingastofu og síðar við Þjóðleikhúsið ákvað hann að stofna eigið fyrirtæki þar sem hann sinnir hugmynda- og textavinnu fyrir fyrirtæki og stofnanir. Að hans sögn hentar sveitalífið þeirri vinnu einstaklega vel. „Til þess að skapa góðar hugmyndir þarf bæði einbeitingu og rými til að hugsa. Hér er minna áreiti og ég finn hvað það skilar sér í vinnunni.“ Hann segir starf hugmyndasmiðs felast í því að hjálpa fyrirtækjum og einstaklingum að koma skilaboðum sínum og vöru á framfæri með skapandi hætti. „Í dag þarf bæði gæði og frumleika til að ná athygli fólks. Annars hverfa skilaboðin einfaldlega í hávaðanum.“ Þótt heimaskrifstofan sé aðalvinnustaðurinn fer hann reglulega til Reykjavíkur á fundi þegar verkefnin krefjast þess. „Ég fer yfirleitt einu sinni eða tvisvar í viku í bæinn, en öll undirbúningsvinnan og skrifin fara fram hér heima.“

**Matthías Tryggvi Haraldsson á tónleikaferðalagi í Póllandi í kjölfar Eurovision ævintýrisins. Ljósm. úr einkasafni**

Fjölbreytt tónlistarlíf

Brynhildur hefur einnig komið sér vel fyrir í nýju samfélagi. Hún kennir söng við Tónlistarskóla Borgarfjarðar, syngur með hljómsveitinni Kvikindi og vinnur að útgáfu annarrar breiðskífu sveitarinnar. Auk þess hefur hún komið að stofnun barnakórs við Heiðarskóla og sinnir sunnudagaskóla í Leirárkirkju. „Það er ótrúlega gefandi að starfa hér. Það er nóg að gera og okkur líður virkilega vel.“ Fjölskyldan hefur jafnframt tekið fyrstu skrefin í sjálfsþurftarbúskap. Í garðinum eru komnar matjurtir og nýlega bættust sex hænuungar í hópinn. „Við eigum okkur drauma og eru með alls konar hugmyndir varðandi lóðina,“ segir Brynhildur. „Við viljum byggja gróðurhús, gestahús og sánu. Það eru alltaf ný verkefni að fæðast.“ Matthías tekur undir. „Það er eiginlega hættulegt hvað okkur dettur margt í hug.“

Ástin sigrar allt

Ástarsaga og kynni þeirra Matthíasar og Brynhildar hófst í Listaháskóla Íslands þar sem þau stunduðu bæði nám. Matthías var þá kominn á annað ár í sviðshöfundanámi þegar Brynhildur hóf sitt nám. „Ég sá hana fyrst í kennslustund og síðan í kaffiteríunni. Þegar ég sá hana fyrst var þetta ást við fyrstu sýn,“ segir Matthías. Brynhildur viðurkennir að hún hafi verið heldur lengur að sannfærast. „Hann var með sítt, krullað hár sem heillaði mig ekkert sérstaklega í fyrstu,“ segir hún og hlær. „En þegar hann lét klippa sig fór ég að sjá hann í öðru ljósi.“ Leiðir þeirra lágu saman og í sundur um tíma, en skömmu eftir heimsfaraldurinn hittust þau aftur fyrir tilviljun í sundlaug. „Þá small allt saman. Sex mánuðum síðar vorum við trúlofuð og stuttu síðar komin á leið með okkar fyrsta barn,“ segir Brynhildur. Í dag eiga þau tvær dætur, Sóleyju fjögurra ára og Bergrós sem er tveggja ára. Stúlkurnar njóta sín vel í sveitinni og segja foreldrarnir það vera staðfestingu á því að flutningurinn hafi verið rétt ákvörðun.

**Tveir af sex kjúklingum sem hjónin eru að koma á legg, en myndin er frá því í vor. Ljósm. úr einkasafni**

Eurovision varð ævintýri, aðdáendur víðs vegar um heiminn

Þótt Matthías starfi nú fyrst og fremst við rit- og hugmyndavinnu tengja margir hann enn við hljómsveitina Hatara, sem vakti heimsathygli þegar hún keppti fyrir Íslands hönd í Eurovision árið 2019. Hann lítur þó á þann kafla sem einstakt ævintýri fremur en framtíðarstarf. „Það var aldrei markmiðið að verða atvinnusöngvari. Þetta byrjaði einfaldlega sem skapandi samstarf vina sem óx langt fram úr öllum væntingum.“ Þátttakan í Eurovision opnaði dyr að tónleikaferðalögum víða um Evrópu. „Við fengum tækifæri sem örfáir fá. Að standa á sviði fyrir framan þúsundir áhorfenda og vitandi það að milljónir fylgdust með í sjónvarpi var ótrúleg upplifun.“

Lífið á tónleikaferðalögum hafi stundum verið krefjandi. „Þetta var í senn útgerð og ferðalag með vinum. Við bjuggum vikum saman í rútum og hótelum og ferðuðumst stöðugt á milli landa. Þetta var skemmtilegt en hentar fólki misvel.“ Þegar sá kafli var á enda fannst honum eðlilegt að snúa sér að öðrum verkefnum. „Á einhverjum tímapunkti þarf maður einfaldlega að ákveða hvað maður ætlar að gera þegar maður verður stór,“ segir Matthías.

Brynhildur segir að þótt nokkur ár séu liðin frá Eurovision hafi áhugi aðdáenda ekki minnkað. „Matthías er ekki á samfélagsmiðlum þannig að skilaboðin enda oft hjá mér. Ég fæ reglulega kveðjur frá fólki alls staðar að úr heiminum sem óskar okkur til hamingju með afmæli eða Valentínusardaginn. Það er eiginlega bara mjög fallegt.“ Hún viðurkennir þó að hún hafi fundið fyrir ákveðnum óþægindum þegar hún horfði síðar á heimildarmynd um Eurovision-ævintýrið hans Matthíasar. „Þá áttaði ég mig betur á því hversu mikil spenna ríkti í kringum þátttökuna.

Stór kvikmyndataka í heimagarðinum

Framtíðin liggur að þeirra sögn í Hvalfjarðarsveit. Þar vilja þau halda áfram að byggja upp heimili sitt, ala upp dæturnar og taka virkan þátt í samfélaginu. „Okkur líður einstaklega vel hér og sjáum hvað stelpunum okkar vegnar vel. Það skiptir mestu máli,“ segja þau. Matthías bætir við með brosi á vör: „Ef fólk vantar hugmynda- eða textaráðgjöf þá má það endilega hafa samband. En fyrst og fremst hlökkum við til að taka þátt í samfélaginu hér.“ Þrátt fyrir kyrrðina í sveitinni hefur ekkert skort upp á lífið á heimilinu. Nýlega breyttist garðurinn við húsið í kvikmyndasett þegar tekið var upp tónlistarmyndband með söngkonunni Eivøru Pálsdóttur. „Þetta var ótrúlega skemmtilegt verkefni,“ segir Matthías. „Hér mætti stór hópur kvikmyndafólks, byggði sérstakt snúningssvið úti í skóginum og vann við upptökur allan daginn. Það var gaman að sjá hvernig umhverfið hér varð hluti af svo metnaðarfullri framleiðslu.“ Hjónin segja að slíkt sýni vel að hægt sé að sameina skapandi störf og rólegt fjölskyldulíf utan höfuðborgarinnar. „Við fluttum hingað til að skapa okkur betra líf,“ segir Brynhildur. „Núna finnst okkur við vera nákvæmlega á réttum stað,“ segja þessi samrýmdu og geðþekku listahjón að lokum.

**Brynhildur Karlsdóttir tekur við Íslensku tónlistarverðlaununum árið 2022 fyrir hönd hljómsveitarinnar Kvikindi, fyrir plötuna Ungfrú Ísland. Ljósm. úr einkasafni**

Fundu draumalífið í Hvalfirði

Listahjón og hugmyndasmiðir flytja af mölinni í sveitasæluna

Listahjón og hugmyndasmiðir flytja af mölinni í sveitasæluna