Síðastliðinn fimmtudag hófst Hálendisvakt sumarsins hjá Slysavarnafélaginu Landsbjörgu. Líkt og undanfarin 20 ár er það Olís sem styrkir verkefnið. Það voru félagar í björgunarsveitinni Súlum á Akureyri sem fengu fyrsta útkall sumarsins á leið suður Kjalveg, þegar óskað var eftir að athuga með ferðamann í Klakkskála suður af Kerlingafjöllum. Björgunarsveitin Eyvindur var einnig kölluð til. Í Klakkskála var hlúð að ferðamanninum sem var bæði kaldur og blautur.