Faxaflóahafnir hafa opnað nýja útisýningu á Miðbakka við Gömlu höfnina í Reykjavík þar sem sjónum er beint að þróun sjóslysa við Íslandsstrendur síðustu 150 árin. Sýningin, Sjóslys við Ísland, byggir á viðamikilli heimilda- og rannsóknarvinnu og dregur upp mynd af skipum yfir 12 tonnum sem fórust eða skemmdust svo mikið að þau urðu ekki sjófær á ný. Hundruð sjóslysa eru kortlögð og sett fram með myndrænum hætti sem sýnir hvernig slysatíðni og eðli sjóslysa hafa breyst í takt við þróun skipaflotans, fiskveiða og öryggismála.

Jafnframt er sérstök áhersla lögð á stórslys, áhrif heimsstyrjaldanna á siglingar við Ísland og sögu erlendra fiskiskipa, meðal annars franskra, breskra og þýskra skipa sem fórust við landið. Sýningin er unnin fyrir Faxaflóahafnir og verður opin almenningi á Miðbakka allan sólarhringinn fram til loka október. Höfundar hennar eru Guðjón Ingi Hauksson sagnfræðingur, Guðmundur Viðarsson ljósmyndari og sýningarstjóri og Agnar Jónas Jónsson skipasmiður.

Sjóslysasaga Íslands síðustu 150 ára sett upp á Miðbakka