Rætt við Unni Brá Konráðsdóttur sveitarstjóra í Borgarbyggð

Meirihluti Borgarbyggðarlista og Sjálfstæðisflokks réði Unni Brá Konráðsdóttur fyrrverandi þingmann og forseta Alþingis í starf sveitarstjóra Borgarbyggðar. Unnur Brá er þegar sest í stól sveitarstjóra og er að leita að hentugu húsnæði fyrir sig og fjölskylduna. Henni líst afar vel á nýja starfið. Eins og tíðkast með nýja sveitarstjóra á Vesturlandi spjallaði blaðamaður stuttlega við Unni til að kynnast henni nánar.

Úr stórum systkinahópi af Suðurlandi

Fyrst að upprunanum, hver er Unnur Brá? „Ég er fædd og uppalin á Búðarhóli í Austur-Landeyjum og er yngst níu alsystkina. Foreldrar mínir voru Konráð Óskar Auðunsson og Sigríður Haraldsdóttir. Ég er gift og á þrjú börn og eitt stjúpbarn. Varð stúdent frá Menntaskólanum á Laugarvatni og lögfræðingur frá Háskóla Íslands. Lauk embættisprófi frá HÍ árið 2000. Þá hef ég aflað mér réttinda til málflutnings fyrir héraðsdómstólum og stundað meistaranám í opinberri stjórnsýslu við Háskóla Íslands.“

Þingmennska og sveitarstjórn að baki

Unnur Brá sat á Alþingi fyrir Sjálfstæðisflokkinn á árunum 2009–2017 og gegndi embætti forseta Alþingis árið 2017. Hún var varaþingmaður bæði kjörtímabilið á undan og eftir þingsetuna. „Frá því ég lauk þingmennsku hef ég gegnt margvíslegum trúnaðar- og stjórnunarstörfum. Ég var m.a. aðstoðarmaður ríkisstjórnar Katrínar Jakobsdóttur árin 2018–2020 og starfaði sem aðstoðarmaður Guðlaugs Þórs Þórðarsonar, umhverfis-, orku- og loftslagsráðherra, á árunum 2022–2024. Þá starfaði ég sem formaður stýrihóps um framkvæmdir við nýjan Landspítala 2020-2022. Áður en ég tók sæti á Alþingi var ég sveitarstjóri Rangárþings eystra og var jafnframt kjörin fulltrúi í sveitarstjórn.“

Unnur Brá á tengingu við Borgarfjörðinn. „Bróðir minn Gunnar Markús býr á Kleppjárnsreykjum ásamt fjölskyldu sinni og ein besta vinkona mín ólst upp í héraðinu. Aðrar tengingar á ég ekki við sveitarfélagið.“

Velferð íbúa og ábyrg fjármál

Aðspurð segir hún að á kjörtímabilinu verði lögð er áhersla á að byggja upp sterkt og sjálfbært samfélag þar sem velferð íbúa og ábyrg fjármál fara saman. „Við ætlum okkur að tryggja skýra stjórnun, stöðugleika og aukið traust milli íbúa og kjörinna fulltrúa. Meirihlutinn leggur áherslu á að vinna saman að því að skapa samfélag þar sem allir íbúar sveitarfélagsins njóta jafnræðis, hvort sem er í dreifbýli eða þéttbýli. Ég lít svo á að hér í Borgarbyggð liggi mikil tækifæri til að gera sterkt og gott samfélag enn betra.“

Unnur Brá er þakklát fyrir það traust sem henni var sýnt að fá að gegna starfi sveitarstjóra Borgarbyggðar næstu árin. „Ég er auðmjúk gagnvart þeirri ábyrgð sem fylgir því að þjóna öllum íbúum þessa sveitarfélags, óháð pólitísku viðhorfi eða búsetu. Verkefnin eru skýr; við ætlum að tryggja góða þjónustu, umgjörð fyrir sterkt atvinnulíf og að Borgarbyggð sé staður þar sem fólk velur sér búsetu. Ekki af nauðsyn, heldur vegna þess að hér er best að búa. Í þessum töluðu orðum er ég að vinna í því að finna húsnæði hér á svæðinu fyrir fjölskylduna en ég tel að það sé mjög mikilvægt fyrir mig að búa í Borgarbyggð og vera hluti af því samfélagi sem ég þjóna. Mér líst afskaplega vel á sveitarfélagið og fólkið sem ég hef kynnst nú þegar og hlakka til verkefnanna fram undan,“ sagði Unnur Brá að endingu.

Nýr sveitarstjóri hlakkar til verkefnanna fram undan

Rætt við Unni Brá Konráðsdóttur sveitarstjóra í Borgarbyggð

Rætt við Unni Brá Konráðsdóttur sveitarstjóra í Borgarbyggð