Spjallað við Birki Jón Jónsson bæjarstjóra Grundarfjaraðarbæjar

Eftir að úrslit bæjarstjórnarkosninganna í Grundarfirði lágu fyrir að kvöldi 16. maí var ljóst að í stól bæjarstjóra myndir Birkir Jón Jónsson setjast. Blaðamaður Skessuhorns heyrði hljóðið í Birki en hann er nú í óða önn að kynnast nýju starfi og bæjarbúum, hefur fest kaup á húsi og býr sig undir flutning. Hann kveðst fullur tilhlökkunar að takast á við starf bæjarstjóra.

En fyrst að upprunanum: „Ég er 46 ára, fæddur og uppalinn á Siglufirði en ættir mínar eru úr Fljótum í Skagafirði. Ég dvaldi í fjögur ár á Sauðárkróki þaðan sem ég útskrifaðist úr Fjölbrautaskóla Norðurlands vestra árið 1999. Ég las stjórnmálafræði við HÍ og lauk MBA prófi í viðskiptum og stjórnun frá sama skóla. Þá gerðist ég aðstoðarmaður Páls Péturssonar félagsmálaráðherra árið 2001-2003 en það ráðuneyti fór með málefni sveitarstjórnarstigsins. Árið 2003 var ég svo kjörinn á Alþingi og sat þar í tíu ár. Eftir þingsetuna var ég í eitt kjörtímabil, árin 2006-2010, í bæjarstjórn Fjallabyggðar og árið 2014-2022 í bæjarstjórn Kópavogs þar sem ég var formaður bæjarráðs 2018-2022. Var nú síðast aðstoðarmaður Sigurðar Inga Jóhannssonar formanns Framsóknarflokksins.“

Uppeldið mótaði

Birkir Jón á tvær dætur; Auði Björk og Guðrúnu Halldóru sem eru 14 ára gamlar. „Ég festi mér kaup á raðhúsi, Ölkelduvegi 31, sem verið er að standsetja og mun væntanlega flytja inn á næstu vikum. Ég er mjög spenntur fyrir þessum breytingum. Bæjarbúar og samstarfsfólk hafa tekið einstaklega vel á móti mér og ég hlakka til að tilheyra og taka virkan þátt í þessu samfélagi.“

Birkir Jón er í hópi fremstu bridgespilara landsins og kemur úr fjölskyldu á Siglufirði þar sem hreinlega allir spila. „Ég er núna á leið á Evrópumót í bridge sem fram fer í Riga í Lettlandi en landsliðið í opnum flokki hefur æft markvisst síðustu mánuði.“ Hann segist vonast til að eitthvert líf færist í bridgeíþróttina á Snæfellsnesi með haustinu. „Fyrir utan bridge þá hef ég mikinn áhuga á mat. Finnst gaman að elda góðan mat, gera góðar brauðtertur og heita brauðrétti. Vinir mínir gera grín að því hversu gamaldags ég get verið þegar kemur að mat en það mótast af uppeldinu – en báðar ömmur mínar gáfu mér ómælt mikið að borða á milli þess sem þær spiluðu við mig. Þannig að það uppeldi hefur mótað mig mikið og ég bý enn að.“

Áskorunin verður að halda úti góðri þjónustu

Birkir Jón segir samfélagið gott í Grundarfirði. „Áskoranir okkar er að halda úti góðri þjónustu við íbúa bæjarins en jafnframt að horfa til þeirra tækifæra sem eru fyrir hendi og geta eflt atvinnulífið og fjölgað störfum. Þar gerir bæjarfélagið ekki eitt og sér en með góðru samvinnu við einkaframtakið er fjölmargt hægt að gera. Ég starfa í umboði bæjarstjórnar þar sem heilmikil þekking er fyrir hendi og samstarfið byrjar vel. Ég hef trú á því að góð samvinna leiði til góðra hluta. Ég er mjög spenntur fyrir komandi verkefnum og umfram allt þakklátur fyrir að fá tækifæri til að láta gott af mér leiða fyrir Grundarfjörð,“ segir Birkir Jón að endingu.

Landsliðsmaður í bridge og áhugamaður um brauðtertur

Spjallað við Birki Jón Jónsson bæjarstjóra Grundarfjaraðarbæjar

Spjallað við Birki Jón Jónsson bæjarstjóra Grundarfjaraðarbæjar