Soffía Björg Óðinsdóttir, listamanneskja Borgarbyggðar, tekin tali

Soffía Björg Óðinsdóttir er frá Einarsnesi í Borgarfirði og ólst þar upp. Soffía var útnefnd sem listamanneskja Borgarbyggðar 2026 og var útnefningin tilkynnt við hátíðlega athöfn á þjóðhátíðardaginn í Skallagrímsgarðinum í Borgarnesi. Soffía Björg hefur um árabil verið áberandi í íslensku tónlistarlífi sem söngkona, gítarleikari, lagahöfundur og tónskáld. Hún lauk BA-prófi í klassískum tónsmíðum frá Listaháskóla Íslands og hefur einnig stundað söngnám við FÍH og Söngskólann í Reykjavík. Á ferli sínum hefur Soffía gefið út fjölmörg lög og hljómplötur líkt og Brother Grass, Jól og The Company You Keep. Þá hafa lög á borð við Dreamcatcher, Redwing og Yfir Regnbogabrúnni notið mikillar athygli á síðustu árum. Eftir að grunnskólanum lauk fór hún til náms í Fjölbrautaskóla Vesturlands á Akranesi og útskrifaðist þaðan af félagsfræðibraut. „Það er svona námsleiðin sem maður velur þegar maður veit ekki hvað maður ætlar að fara að gera,“ segir Soffía í samtali við blaðamann. „Eftir það fór ég að læra klassískan söng við Söngskólann í Reykjavík. Ég var þar í um það bil eitt og hálft ár, en fann að það var kannski ekki alveg mín leið, þannig að þaðan fer ég í FÍH (Félag íslenskra hljómlistarmanna), en mér fannst röddin mín passa betur á því sviði og kláraði þar sjötta stig. Í framhaldinu af því fór ég í Listaháskólann og útskrifaðist þaðan 2014,“ bætir Soffía við.

Hefur spilað og sungið víða um heim

Það sem er einkennandi fyrir listsköpun Soffíu er mikill sköpunarkraftur og hin mikla breidd sem hún býr yfir, því ferill hennar spannar ekki einungis tónlist og tónsmíðar, heldur einnig myndlist. Aðspurð varðandi það segir hún: „Þeir sem vita af mér sem listakonu eða þekkja mig sem tónlistarkonu og hafa verið að fylgjast með mér, vita að frá 2010 hef ég verið að spila á gítar og syngja, en aðeins spilað á píanó líka, en síðast liðin tvö ár hef ég verið að leika mér að mála alls konar myndir heima. Það var svona leið til þess að slökkva á hausnum á mér á kvöldin. Það var ekkert plan að gera neitt með það, en stúdíóið mitt var farið að fyllast af málverkum svo að þá ákvað ég að halda sýningu í Safnahúsinu í Borgarnesi í maí. Sýningin hét Jaðarsjón og það gekk svona glimrandi vel. Mér leið samt eins og ég væri að halda mína fyrstu tónleika. Þetta var svona ný tilfinning. En þetta gekk mjög vel, virkilega gaman og fullt af fólki sem mætti á opnunina. Í kjölfarið var mér boðið að halda sýningu í Reykjavík líka og ég er aðeins að skoða það betur.“ Soffía er búin að koma víða við á ýmsum tónlistarviðburðum og hátíðum á umliðnum árum og innt eftir því segir hún: „Ég hef spilað á öllum helstu hátíðum hérna heima, bæði með hljómsveitinni Brother Grass, sem var mikið starfandi frá 2010 til 2014 og líka sem sóló artisti. Síðan hef ég túrað um Pólland, spilað í Sviss, Hollandi, Los Angeles og New York. Einhvern veginn koma til manns svona skemmtileg og óvænt tækifæri og mig hefði aldrei órað fyrir því að minn vegur ætti eftir að verða svona. Ef maður finnur innst inni að svarið sé já, þó að maður sé hræddur við það, þá bara gerir maður það,“ segir Soffía Björg.

**Soffía Björg kom fram auk fjölda annars listafólks á tónleikum Kaleo á Þingvöllum 20. júní sl. og er hér ásamt forsetahjónunum Höllu Tómasdóttur og Birni Skúlasyni**

Mikil upplifun á tónleikum hjá Ennio Morricone

Hvernig tónlist hlustar Soffía á, aðhyllistu einhverjar sérstakar tónlistarstefnur? „Já, ég hef alltaf verið hrifin af svona „eyðimerkur“ gítarstemningu. Þá á ég við tónlist sem líkist svolítið spaghetti vestrunum eins og tónlistinni hans Ennio Morricone sem ég er afar hrifin af. Þegar ég komst inn í Listaháskólann að læra tónsmíðar þá var ég alveg glötuð í fræðunum. Minn tónsmíðameistari vissi í raun ekkert hvað hann átti að gera við mig til að byrja með. Ég var bara að hlusta á einhverja þjóðlagatónlist og svoleiðis. Tónsmíðameistarinn minn var hins vegar klassískur og á endanum duttum við niður á tónskáld sem okkur báðum líkaði við og það var Ennio Morricone. Þá náði ég góðri tengingu og við unnum út frá því. Ég náði eitt sinn að fara á tónleika með honum og það var stórkostleg upplifun.“

Nú er stórt verkefni fram undan hjá þér, segðu okkur aðeins frá því. (Vakin er athygli á að viðtalið var tekið fyrir síðustu helgi). „Já, það er núna á laugardaginn 20. júní. Það er Kaleo og Jakob Frímann sem ætla að halda risa tónleikahátíð á Þingvöllum um næstu helgi sem heitir Bergmál. Ég spilaði í fyrra á fyrstu tónlistarhátíðinni sem þeir héldu, en það var „Vor í Vaglaskógi“ fyrir framan tíu þúsund manns, sem var alveg hafsjór af fólki. Núna stefnir í að það verði helmingi fleiri áheyrendur á Þingvöllum, þannig að ég get varla ímyndað mér stemninguna sem verður þar. Ég og Fríða Dís, sem spilar mikið með mér, syngur með mér og leikur á bassa. Við ætlum að taka svona gítar- og bassa sett á tónleikunum.“ Eru það íslensk lög sem þið ætlið að taka eða erlend? „Ég er búin að vera að syngja svolítið á íslensku undanfarið en núna ætla ég að keyra svolítið á erlendum lögum, spila ameríska sveitatónlist. Ég finn að mig langar að setja tónleika upp með þannig stílbragði núna.“

**Soffía Björg og Fríða Dís á Reykjavík Folk Festival í mars 2026. Ljósm. Gísli Kjaran**

Auðmjúk og þakklát fyrir viðurkenninguna

Aðspurð segir Soffía Björg útnefninguna sem listamanneskja Borgarbyggðar hafa komið sér mjög á óvart. „Já, það kom mér virkilega á óvart. Þórunn í Safnahúsinu var að hjálpa mér að setja upp sýninguna Jaðarsjón. Hún hringir síðan í mig á mánudegi og ég bjóst við að símtalið varðaði frágang á sýningunni eða eitthvað tengt henni, en þá var hún að láta mig vita að ég hefið verið kosin listamanneskja Borgarbyggðar. Og ég heyrði ekki alveg hvað hún sagði svo ég spurði; „lista hvað, hvað segirðu?“ Þá tilkynnti hún mér að ég hefði hlotið þann heiður að vera kosin listamanneskja Borgarbyggðar og þetta fannst mér alveg rosalega stórt. Þetta er bara stórkostleg tilfinning að verða fyrir svona vali, því það eru svo margir í Borgarbyggð og þessu bæjarfélagi Borgarnesi sem eiga þetta skilið, svo að ég tek þessu mjög alvarlega og ekki sem sjálfsögðum hlut. Og ég er mjög auðmjúk og þakklát fyrir að hafa hlotið þessa viðurkenningu. Ég held að ég sé búin að losa mig við mesta egóið – það hentar ekki neinum að keyra á því í vinnu,“ segir Soffía Björg og hlær. „Þetta var alveg ótrúlega gaman, en ég verð að viðurkenna að ég var svolítið stressuð á þjóðhátíðardaginn að taka á móti þessari nafnbót. Það er langt síðan ég hef fundið fyrir svona stressi,“ bætir hún við.

Aðspurð kveðst Soffía Björg ekki finna fyrir stressi þegar hún stígur fram á söngsviðið en því fylgir alltaf smá spenna. „Það er ekki sviðsskrekkur í dag eins og þegar ég var að byrja á fyrstu árunum í tónlistinni. Þegar maður er með góðu og vel spilandi fólki og þegar umgjörðin er eins stórkostleg og þessi hátíð sem verður núna um helgina (Bergmál) þá er ekki annað hægt heldur en að njóta þess. Það er svo gaman þegar maður lendir í svona ævintýri og útópíu. Það verður fullt af hljómsveitum að spila yfir allan daginn á tveimur sviðum. Síðan er það líka dagsformið á manni sem skiptir máli varðandi frammistöðu á sviðinu.“

Ný tækifæri og að hafa gaman af lífinu

Svona að lokum, hlustarðu á þína eigin tónlist? „Nei, það geri ég ekki,“ segir Soffía og skellihlær. En hvað skyldi Soffía hlusta á þegar hún vill slaka á, eiga stund með sjálfri sér eða er að mála. „Þá finnst mér æðislegt að setja á einhverja instrumentaltónlist (tónlist án söngs) eða eitthvað svoleiðis. t.d. Khruangbin eða Hermanos Guitarres sem að svolítið dettur í bakgrunninn og gefur ADHD heilanum nægilega örvun, en ekki það mikið að það trufli mann. Ég byrjaði eins og ég sagði áðan að mála fyrir svona tveimur til þremur árum og mér hefur alltaf fundist gaman að teikna. En ég hef ekki gert neitt mikið með það fyrr en núna. Ég byrjaði bara í einhverju djóki, fór og keypti mér vatnslitamöppu og byrjaði að lita. Síðan ákvað ég að kaupa mér akrýl striga og mála með akrýl litum og fyrsta myndin sem ég málaði á akrýl heitir Jaðarsjón, hún fór einmitt upp á vegg á sýningunni og seldist þar. Mér finnst það eiginlega fáránlegt af því að í rauninni er allt í listinni tilraunastarfsemi, maður er endalaust að prófa sig áfram. Og það er eins með þetta, stundum hugsa ég bara; er þetta flott? Mér finnst þetta flott! En af því að þetta er svona mikil tilraunastarfsemi þá er listin svona endalaus prufuheimur og það er það sem mér finnst svona skemmtilegast í listinni. Ég er alltaf að kveikja á einhverju nýju og er opin og móttækileg fyrir að prófa nýja hluti. Ég finn t.d. fyrir mikilli slökun þegar ég er að mála og ég held að vinnan við að mála sé svona meiri ró því vinnan við að semja virkar aðeins öðruvísi á heilann. Sú vinna virkar allt öðruvísi. Þá er maður að búa til texta og sögur við melódíur, hljóma og útsetningar sem annars konar þolraun á heilann. Ég týni mér meira við það að mála myndir.“

En hver er stefnan næsta haust og vetur? „Ég hef alltaf haft frekar opna stefnu því að yfirleitt koma tækifærin bara óvænt. Og ef það er eitthvað sem kallar mikið á mann, þá segir maður já við því. Þannig að stefnan er bara að vera opin fyrir nýjum og æðislegum tækifærum og hafa gaman af lífinu,“ segir Soffía Björg að lokum.

**Myndin Jaðarsjón eftir Soffíu Björgu sem seldist á sýningu í Safnahúsinu í Borgarnesi á dögunum. Ljósm. úr einkasafni**

„Mig hefði aldrei órað fyrir því að ævivegurinn ætti eftir að verða svona“

Soffía Björg Óðinsdóttir, listamanneskja Borgarbyggðar, tekin tali

Soffía Björg Óðinsdóttir, listamanneskja Borgarbyggðar, tekin tali