Rætt við Lilju Björg Ágústsdóttur í Dalabyggð

Lilja Björg Ágústsdóttir tók í gær við starfi sveitarstjóra í Dalabyggð. „Ég er fædd og uppalin í Búðardal en mamma mín heitir Sigríður Eiríksdóttir og er sjúkraliði en hún vann lengst af á Silfurtúni. Pabbi minn heitinn hét Ágúst Magnússon og var húsasmíðameistari. Ég bjó í Dölunum þar til ég fór í framhaldsskóla 16 ára gömul. Ég var þó oft fyrir vestan en foreldrar mínir bjuggu þar til ársins 2020.“ Lilja segist enn þekkja töluvert af fólki sem er búsett í Dölunum og á þar vini. „Ég ber sterkar taugar til samfélagsins og hlakka virkilega til að koma aftur heim. Mér lýst líka mjög vel á nýkjörna sveitarstjórn. Þar er fólk á öllum aldri, með mismunandi reynslu og er tilbúið að vinna í þágu íbúa og ber hagmuni samfélagsins augljóslega fyrir brjósti. Eins finnst mér jákvæðni og metnaður einkenna það viðmót sem ég hef fengið.“

Aðspurð um menntun segist Lilja Björg í grunninn vera menntaður grunnskólakennari en er auk þess með grunn- og meistaragráðu í lögfræði og málflutningsréttindi fyrir héraðsdómi. „Ég kenndi í nokkur ár við Grunnskóla Borgarfjarðar, starfaði sem verkefnastjóri kennslu og stundakennari við Háskólans á Bifröst en einnig sem lögmaður og síðar eigandi á lögmannsstofunni OPUS lögmenn.“

Lilja hefur breiða reynslu af sveitarstjórnarmálum. „Ég hef komið að sveitarstjórnarmálum frá árinu 2012 í fjölbreyttum hlutverkum, meðal annars sem sveitarstjórnarfulltrúi, forseti sveitarstjórnar, sveitarstjóri, staðgengill sveitarstjóra, nefndarmaður og stjórnarmaður í ýmsum ráðum og stjórnum. Þá hef ég starfað bæði sem lögfræðingur hjá Akraneskaupstað og síðustu ár sem sviðsstjóri fjármála- og stjórnsýslu og staðgengill sveitarstjóra hjá Borgarbyggð.“

Eiginmaður Lilju Bjargar er Þorsteinn Pálsson rekstrarverkfræðingur. „Við eigum fjóra syni og eina litla ömmu- og afa stelpu. Við bjuggum í 15 ár á Signýjarstöðum í Hálsasveit en fluttum fyrir fjórum árum í Borgarnes þar sem við erum búsett núna. Það hefur ekki verið tekin ákvörðun um að flytjast búferlum enn sem komið er enda virðist vera nokkuð erfitt að fá húsnæði í Búðardal. Við erum einnig með einn son sem fer í Menntaskóla Borgarfjarðar í haust. Við erum samt sem áður opin fyrir þeirri hugmynd ef tækifæri gefst enda er gott að vera í Dölunum. Ég mun þannig færa lögheimilið vestur en dvelja á báðum stöðum til að byrja með og ætlar fjölskyldan að vera dugleg að koma með mér í Dalina þegar tækifæri gefst enda stutt að fara.“

Lilja Björg hóf formlega störf í gær. „Fyrst í stað ætla ég að heimsækja allar stofnanir og vinnustaði og leggja mig fram um að hitta og kynnast íbúum. Eins mun ég setja mig inn í þær áherslur sem ný sveitarstjórn vill setja og kynna mér vel þau verkefni sem ákveðið hvefur verið að ráðast í. Dalabyggð stendur á ákveðnum tímamótum. Á síðustu árum hefur verið ráðist í umfangsmikla uppbyggingu, þar á meðal byggingu glæsilegs íþróttahúss og sundlaugar í Búðardal. Framkvæmdin var tímabær og mikilvægt skref og hefur styrkt aðstöðu til íþrótta- og tómstundaiðkunar og aukið lífgæði mikið. Framkvæmdir af þessari stærðargráðu reyna jafnframt á fjárhaginn og því er mikilvægt að tryggja fjárhagslegan stöðugleika og skapa svigrúm til áframhaldandi uppbyggingar. Halda þarf vel utan um reksturinn, forgangsraða verkefnum og leita leiða til að halda uppi góðri þjónustu án þess að auka álögur á íbúa.“

Lilja segir mikilvægt að fylgja eftir uppbyggingunni m.a. með að tryggja að íþróttamannvirkin séu vel nýtt af íbúum og virki sem aðdráttarafl fyrir gesti og nýja íbúa. „Einnig þarf að vinna áfram að uppbyggingu á atvinnuhúsnæði, stuðla að uppbyggingu íbúðarhúsnæðis, efla áfram atvinnulíf og skapa skilyrði fyrir fjölbreyttari atvinnumöguleikum. Þrátt fyrir þær áskoranir sem fylgja rekstri fámenns sveitarfélags hafa Dalamenn ítrekað sýnt að í samfélaginu býr mikill kraftur, frumkvæði og seigla. Á undanförnum árum hefur fjölbreytt atvinnulíf þróast samhliða hefðbundnum atvinnugreinum og nýsköpun verið á sviði matvælaframleiðslu, ferðaþjónustu og skapandi greina. Þessi kraftur hefur vakið athygli langt út fyrir héraðið,“ segir Lilja Björg að endingu.

Nýr sveitarstjóri ber sterkar taugar til samfélagsins

Rætt við Lilju Björg Ágústsdóttur í Dalabyggð

Rætt við Lilju Björg Ágústsdóttur í Dalabyggð