Gunnlaugur Karl Hreinsson hjá GPG fiskverkum á Húsavík festi árið 2004 kaup á sjávarútvegsfyrirtækinu Þórsnesi ehf. í Stykkishólmi og hefur átt stærstan hlut þess síðan. Einhverjum árum síðar kaupir Eggert Halldórsson framkvæmdastjóri 15% hlut í fyrirtækinu, en hann hefur stýrt því frá 2004. Nú er búið að ganga frá kaupum félags í eigu Guðmundar Kristjánssonar frá Rifi á öllu hlutafé í Þórsnesinu; skipi, búnaði og veiðiheimildum. Útgerðin verður áfram rekin í Stykkishólmi með óbreyttu sniði og jafnframt mun Eggert Halldórsson áfram verða framkvæmdastjóri fyrirtækisins.

Þórsnes ehf. var á sínum tíma umsvifamikið í veiðum og vinnslu skelfisks. Fyrirtækið hefur frá því að skelveiðar lögðust af rekið útgerð og fiskvinnslu og starfa að jafnaði 50-60 manns hjá fyrirtækinu. „Ég er mjög ánægður með þetta og lít björtum augum til framtíðar í rekstri Þórsness,“ sagði Eggert í samtali við Skessuhorn.