Fyrir bikarleik ÍA og Víkings á föstudagskvöldið var afhjúpaður minningarsteinn til heiðurs Sigursteini Gíslasyni knattspyrnumanni. „Steini Gísla hafði djúp og varanleg áhrif á ÍA og allt samfélagið sem umlykur félagið. Steinninn hefur verið reistur við leikmannainnganginn á Elkemvellinum – þar sem leikmenn ganga út á völlinn. Það er vel við hæfi, því þaðan hóf Steini ótal sinnum gönguna inn á völlinn til þess að leiða sitt lið til sigurs,“ segir í tilkynningu frá KFÍA. Til að heiðra minningu Steina Gísla mun leikdagsboltinn framvegis hvíla á steininum og verða tekinn með af honum inn á völlinn fyrir alla leiki ÍA á Elkemvellinum.