Ferð starfsfólks FVA og maka til Ítalíu 1.-6. júní 2026

Fjölbrautaskóli Vesturlands hefur lengi verið í öflugu samstarfi við skóla í Evrópu þar sem nemendur og kennarar héðan heimsækja skóla erlendis og kynna sér skólastarf og skólamenningu. Á móti koma síðan nemendur og kennarar erlendis frá í heimsókn í skólann okkar.

Síðastliðinn vetur heimsóttu okkur Ítalir, sem eftir góðar móttökur í FVA, linntu ekki látum fyrr en stjórnendur (og ferðanefnd FVA) samþykktu að koma í heimsókn í skólana þeirra.

Skólaheimsókn var því sett á dagskrá í byrjun júní. Mikill áhugi var á ferðinni, enda Ítalía góð heim að sækja, og voru samtals 60 skráðir, starfsmenn og makar. Einhverjir voru spenntir og fóru fyrr af stað en þorri fólks mætti í Leifsstöð í bítið á mánudegi. Mönnun áhafna í vélar Icelandair setti þó strik í reikninginn og urðu nokkrir að gera sér að góðu að fara í tengiflug til Rómar í gegnum Amsterdam. Allir komust þó á ákvörðunarstað á endanum. Þar sem þriðjudagurinn var þjóðhátíðardagur Ítalíu, og 80 ára lýðveldisafmæli í þokkabót, var ekki unnt að hefja skólaheimsóknir þann daginn og var sá dagur því frjáls. Þó nokkuð tilstand var í miðborginni, búið að stilla upp áhorfendapöllum víða, lögregla á öllum hornum til að stýra ösinni. Einhverjir fóru og fylgdust með, aðrir fóru á söfn eða ströndina eða tóku rölt um hverfi þar sem rólegra var. Um kvöldið fór þorri fólks í göngu- og matarferð með leiðsögn um Trastevere-hverfið, sem er hugglegt hverfi á vesturbakka Tíber-fljóts.

Fyrri skólaheimsóknin var í úthverfi Rómar. Skólinn IIS Carlo Matteucci er framhaldsskóli sem leggur áherslu á raunvísindi og tölvutækni, í skólanum er einnig sérdeild. Nemendur í framhaldsskólum á Ítalíu eru á aldrinum14-19 ára og tóku þeir vel á móti okkur, héldu tölur og sýndu okkur skólann sinn með kennara á hliðarlínunni. Skólinn var tæknilega vel búinn, tölvur í öllum stofum, tæki til raungreinakennslu nýtískuleg og töflurnar sömuleiðis. Fengum við að fylgjast með nemendum að starfi, við rannsóknir á plöntum og dýrum, við smíðar á tækjum sem forrituð eru til að gera hinar ýmsu kúnstir. Loftræsing í skólanum var engin og gluggar opnir upp á gátt, samt var þar heitt og mollulegt. Kennarar kvörtuðu yfir að þefurinn gæti orðið megn þegar líða tekur á daginn og flestir búnir í íþróttatímum dagsins, en engin sturtuaðstaða er í boði.

Margt er ólíkt með skólastarfi á Íslandi og Ítalíu. Ljóst er húsnæði er mun betra á Íslandi en að námsgagna- og námsmatsstofnun Ítalíu er mun öflugri en sú íslenska. Nóg er af kennsluefni í öllum fögum og miðstýring er talsverð. Þreyta nemendur framhaldsskóla um allt land samræmd próf í tveimur fögum á hverju misseri.

Seinni skólaheimsóknin var í bæinn Tivoli, sem er 30 km norðaustur af Róm. Þessi bær er þekktur fyrir tvo merkisstaði sem eru á heimsminjaskrá UNESCO. Villa d‘este er ítalskt hönnunarmeistaraverk frá 16. öld; óðalssetur með garði á syllum þar sem sjá má ótal gosbrunna í fjölda útfærslna. Þá eru þar rústir hinnar gríðarstóru sumarhallar Hadrians keisara, sem ríkti á árunum 117-138.

Skólinn ITI Alessandro Volta leggur áherslu á tækninám og býður upp á góða þjálfun fyrir atvinnulífið auk þess að undirbúa nemendur fyrir háskólanám í greinunum. Skólameistari átti ekki heimangengt og því tók á móti okkur enskukennarinn Antonietta, flutti hún okkur hjartnæma ræðu sem innblásin var af ræðu Martin Luther King um draum um farsælt samband skólafólks Ítalíu og Íslands. Dálítil ringulreið tók við en þó fundu flestir einhverjar stofur þar sem nemendur kynntu verkefni sín sem mörg snerust um mekatróník, vélmenni, sýndarveruleika, þyrluflughermi og þrívíddarprentun. Þá flutti eldri kennari, sem við fengum upplýsingar um að hefði nýlega misst manninn sinn, lítinn fyrirlestur um heimsókn Kólumbusar til Íslands þar sem hann fékk upplýsingar frá Mörlöndum um að stórt land væri að finna í vestri. Eitthvað fannst okkur þetta nú skrýtið. Í skólanum var ágæt loftræsing en húsakostur ekkert sérstakur og hljóðvist slæm. Heimsókninni lauk með því að starfsfólki FVA var boðið í flug með dróna í gegnum sýndargleraugu. Að heimsókn lokinni fóru flestir og röltu um þröngar fallegar götur í miðbæ Tivoli, fóru á útsýnispall þar sem sjá mátti vítt yfir Campa Romagna og röltu niður í hið margrómaða Villa d’este.

Góður rómur var gerður að þessum heimsóknum og voru allir á einu máli um að halda tengslum við hið ágæta fólk sem tók á móti okkur. Nemendur voru til fyrirmyndar í kynningum og leiðsögn. Þeir voru kurteisir og áhugasamir um Ísland og meira en tilbúnir að spjalla sem og að leyfa okkur að prófa eitt og annað sem þeir eru að sýsla við.

Síðasti dagur ferðarinnar var frjáls og fólk dreifðist um alla borg að sinna sínu. Um kvöldið sameinuðust þó allir í kvöldmáltíð á La Gallina Bianca (Hvítu hænunni) sem var í boði FVA. Var þar glatt á hjalla.

Ítalía og Ítalir eru góð heim að sækja, í Róm er mikil menning og fornminjar á hverju strái. Ferðamennskan er þar mikil og þröng á þingi. Flestir voru því sáttir með þessar fimm nætur í borginni og ánægðir að snúa aftur í ferska loftið og fámennið á Íslandi en einhverjir urðu þó eftir til að leita fleiri ævintýra í landinu langa og mjóa.

Jón Gunnar Axelsson

Höf. er íslenskukennara í FVA

Land veit ég langt og mjótt – ferðasaga

Ferð starfsfólks FVA og maka til Ítalíu 1.-6. júní 2026

Ferð starfsfólks FVA og maka til Ítalíu 1.-6. júní 2026