Kynntust í gegnum prjónaheiminn

Síðastliðinn sunnudag var opnuð ný hannyrðaverslun að Stekkjarholti 8-10 á Akranesi, en hún er opin á þriðju- og fimmtudögum frá klukkan 17-19 og á sunnudögum frá kl. 12-14. Verslunina reka tvær ungar og framtakssamar konur; Fanney Rún Ágústsdóttir og Ína Sigrún Rúnarsdóttir, en þær kynntust í gegnum sameiginlegan áhuga á hannyrðum, prjónaskap og ýmsum tegundum af garni. Blaðamaður Skessuhorns rétt náði tali af Fanneyju í gær, tveimur dögum eftir opnun, en Ína var þá upptekin við að sinna áhugasömu fólki sem komið var í búðina til að spjalla við þær stöllur og kynna sér úrvalið. Verslunin var nánast full af fólki um leið og hún var opnuð síðdegis í gær.

En hvernig kom þetta til? „Við vorum báðar með vefverslanir og ég var búin að vera með vefverslun sjálf í eitt og hálft ár, en Ína var búin að vera með sína í tvö og hálft ár. Og í stað þess að vera í samkeppni þá vildum við fara að vinna saman og stofna verslun í sameiningu. Við fengum húsnæðið afhent viku fyrir opnunardaginn og gerðum allt klárt á einni viku. Við umbreyttum talmeinastofunni sem hér var og í hennar stað er komin þessi glæsilega prjónaverslun,“ segir Fanney. „Við kynnumst í gegnum prjónaheiminn ef svo má segja, í þessum prjónaheimi hér á Akranesi. Við byrjuðum saman með „popup“ í Stúkuhúsinu þegar Díana var þar, en þegar hún flutti út langaði okkur til að gera eitthvað meira. Við vorum að hugsa um að hafa annars konar „popup“ í Jónsbúð eða á einhverjum öðrum stað, en síðan datt þetta húsnæði upp í hendurnar á okkur. Fyrst mér, og ég spurði Ínu hvort hún vildi vera með og hún sagði strax já. En hvað er „popup,“ spyr blaðamaður. „Það er nokkurs konar verslun á hjólum. Þú kemur með verslunina á eitthvað svæði og ert með hana uppi í smá stund, tekur síðan allt saman og ferð með það í burtu.“

Tvö fyrirtæki undir sama þaki

Verslunin heitir tveimur nöfnum, hvers vegna tvö nöfn? „Af því að þetta er sitthvort fyrirtækið undir sama þakinu, þannig að þetta er bæði Vetrargarn, sem er þá vörumerkið mitt og Kyrrð Knit, sem er vörumerki Ínu. Við ákváðum að vera ekkert að leggja niður nöfnin á vefverslununum sem við rákum sitt í hvoru lagi. Við vildum setja þetta undir sama hattinn af því að við erum að vinna saman með sitt hvort fyrirtækið.“ Eruð þið þá með sitt hvora vöruna til sölu? „Við erum báðar með garn og fylgihluti, en það er ekki sama merkið af garni sem við erum með. Og eins og margir vita eru til óteljandi tegundir af garni þannig að hér er hægt að finna allt milli himins og jarðar sem þú þarft fyrir prjónaverkefnið þitt,“ segir Fanney.

Hvernig hafa viðtökurnar verið, eruð þið ánægðar með þær? „Heldur betur! Það eru rosalega margir búnir að koma og kíkja við og þeim finnst þetta æðislegt, að bæta þessu við mannlífið og verslunarflóruna hérna á Akranesi. Þetta er búið að vera svona frá því við opnuðum og á sunnudaginn var fjöldinn allur af fólki sem kom, annars vegar að skoða og hins vegar til að versla. Líka í dag, það er búið að vera stöðugt streymi af fólki frá því við opnuðum. Það er bara yndislegt. Höldum áfram að versla í heimabyggð,“ segir Fanney að endingu.

**Einnig má finna ilmkerti og baðvörur í búðinni**

**Skemmtileg nöfn á garninu: Rabarbara blær, Glottsýslukötturinn, Sun kissed, Purple rain, Bleeding love og Milky way, svo dæmi séu nefnd**

**Vel skipulagt vöruframboð og gott aðgengi**

**Í versluninni er að finna ýmsa smáhluti sem viðkoma hannyrðum**

Ný hannyrðaverslun opnuð á Akranesi

Kynntust í gegnum prjónaheiminn

Kynntust í gegnum prjónaheiminn