Undir lok maímánaðar var hurðinni að Talþjálfun Vesturlands við Stekkjarholt á Akranesi, TalVest, lokað fyrir fullt og allt. Þjónustan sem innt var af hendi á stofunni fólst í greiningu, þjálfun og ráðgjöf vegna tal- og málmeina og störfuðu tveir menntaðir talmeinafræðingar við stofuna. Þeir hafa nú horfið til annarra starfa.

Börn sem greinast með framburðarfávik, málþroskafrávik og stam eiga rétt á talmeinaþjónustu. Þessi þjónusta er lögbundin og eru börnin flokkuð í tvo flokka eftir því hvort ríki eða sveitarfélag beri ábyrgð á að þjónusta þau. Skiptingin er því þannig að sjálfstætt starfandi talmeinafræðingar sinna þjónustu við börn með alvarleg frávik sem falla undir ábyrgð ríkis, en grunnþjónusta við börn með væg frávik sem og skimanir, greiningar, ráðgjöf fellur í verkahring talmeinafræðinga sem starfa hjá sveitarfélögum.

Ljóst er að lokun Talþjálfunar Vesturlands kemur illa niður á íbúum í landshlutanum sem hafa þurft að reiða sig á þessa þjónustu frá því stofan hóf starfsemi sína. Talþjálfun Vesturlands ehf var stofnað árið 2016 og var fyrsta starfsmánuðinn með aðsetur í Brekkubæjarskóla á Akranesi. Í ágúst sama ár var stofan opnuð í nýstandsettu rými við Stekkjarholt 8-10 á Akranesi, hvar hún hefur verið þar til henni var lokað fyrir hálfum mánuði.

Þetta þýðir að um 30 virkir skjólstæðingar og nokkur hundruð börn á biðlista eru nú í óvissu og bíða upp á von og óvon að komast annars staðar í þjálfun – og þá með tilheyrandi kostnaði og fyrirhöfn fyrir fjölskyldur þessara skjólstæðinga. Það virðist vera mikil afturför í þessum málaflokki þar sem fleiri talmeinafræðingar hafa tilkynnt um starfslok á öðrum stofum og því heldur áfram að fækka í þeim hópi sem sinnir þessum skjólstæðingum. Samningar við talmeinafræðinga eru í óvissu og enn heyrist ekkert frá Sjúkratryggingum. Þögn ráðamanna er ærandi, en skilaboðin eru skýr; börn og fullorðnir sem þurfa aðstoð vegna tal- og málmeina virðast ekki skipta máli og biðlistar munu því lengjast.

Talþjálfun Vesturlands hefur verið lokað