Þungarokkshátíðin Sátan fór fram í Stykkishólmi dagana 4.-6. júní við góðar undirtektir gesta og þátttakenda. Um 650 manns sóttu hátíðina sem bauð upp á fjölbreytta dagskrá fyrir ólíka hópa hátíðargesta.

Meðal viðburða voru málþing á Fosshóteli, golfmót á Víkurvelli, gönguferð þar sem farið var yfir sögu þungarokks á Íslandi, auk bingós og pub quiz á Narfeyrarstofu. Mikill áhugi var á dagskrárliðum hátíðarinnar og komust færri að en vildu bæði í bingóið og pub quizið. Hátt í 30 manns tóku þátt í golfmótinu, stöðugur straumur gesta var á málþinginu og vel var mætt í gönguferðina.

Hápunktur hátíðarinnar var þó tónleikahaldið í Íþróttamiðstöðinni þar sem alls komu fram 24 hljómsveitir víðs vegar af landinu og erlendis frá og sköpuðu kraftmikla stemningu alla helgina. Einnig var yngstu kynslóðinni boðið að fylgjast með upphitun hljómsveitarinnar Sólstafa í hádeginu á laugardeginum.

Hátíðin hefur fest sig í sessi sem einn af áhugaverðari menningarviðburðum sumarsins í Stykkishólmi og laðar að sér jafnt tónlistaráhugafólk sem gesti sem vilja njóta fjölbreyttrar dagskrár í einstöku umhverfi.

Skipuleggjendur hafa þegar hafið undirbúning fyrir næstu hátíð og hafa tilkynnt nokkrar hljómsveitir sem munu stíga á svið á næsta ári. Þar á meðal er hin goðsagnakennda íslenska þungarokkshljómsveit HAM, sem hefur vakið mikla athygli meðal aðdáenda hátíðarinnar.

**Gestur á Sátunni í glæsilegum rokkstíl**

**Þær María, Sara, Anna Soffía og Dagný Ósk voru hressar við undirbúning veitingatjalds Ungmennafélagsins Snæfells**

**Hólmararnir Ísleifur Jónsson og Ívar Leo Hauksson eru ungir og efnilegir tónlistarmenn og meðlimir hljómsveitarinnar Sót, sem steig fyrst á svið á fimmtudaginn**

**Smári Tarfur Jósepsson, gítarleikari hljómsveitarinnar Bootles, á sviði**

**Mikil rokkstemning myndaðist á golfmótinu á Víkurvelli**

**Tónleikagestum bauðst að fá sér húðflúr**

**Atli Guðlaugsson söngvari hljómsveitarinnar Power Paladin**

**Hólmfríður og Sigurbjörg seldu varning á vegum Sátunnar**

**Hljómsveitin Sólstafir lokaði hátíðinni á laugardagskvöldi**

Þungarokkshátíðin Sátan var haldin í Stykkishólmi um helgina – myndasyrpa