Síðdegis í gær urðu tímamót þegar hreppsnefnd Skorradalshrepps hélt sinn síðasta fund. Eins og kunnugt er var sveitarfélagið sameinað Borgarbyggð og tekur sameining gildi næstkomandi mánudag. Þrátt fyrir að um tímamótafund væri að ræða var fjölmargt til umræðu og afgreiðslu á fundinum, sem stóð í hálfa fimmtu klukkustund. Ársreikningur sveitarsjóðs var staðfestur eftir síðari umræðu, nokkur skipulagsmál voru til umræðu og afgreiðslu sem og neysluvatnsmál í Birkimóa.