Áhersla verið lögð á uppbyggingu nýs íbúahverfis og leik- og grunnskóla

Mikil innviðauppbygging hefur átt sér stað í Stykkishólmi á undanförnum árum og sú íbúafjölgun sem þar hefur átt sér stað er merki um jákvæðu þróun. Stykkishólmur er sá staður á Vesturlandi sem er hvað vinsælastur heim að sækja og samkvæmt talningu Ferðamálastofu er sveitarfélagið einn vinsælasti áfangastaður ferðamanna á Vesturlandi, en um 400 þúsund manns fara um Súgandisey árlega. Blaðamaður tók nýverið á ferð sinni um Hólminn hús á bæjarstjóranum og ræddi við hann um stöðu sveitarfélagsins í nútíð og framtíð.

Jakob Björgvin Sigríðarson Jakobsson bæjarstjóri segir að mikil fólksfjölgun hafi einkennt Stykkishólm síðasta áratuginn og að sveitarfélagið hafi brugðist við með umfangsmikilli uppbyggingu innviða, íbúðarhúsnæðis og skólamannvirkja. Jakob er fæddur í Stykkishólmi árið 1982 og lýsir sér sem „Hólmara í húð og hár.“

**Nýverið var ráðist í uppbyggingu og endurbætur á hóteli bæjarins**

Íbúðareiningum að fjölga

Samkvæmt nýjustu tölum Hagstofunnar hefur íbúum fjölgað ört undanfarin ár. Fyrir um fjórum árum voru þeir 1280, en nú eru þeir orðnir rúmlega 1360. Að sögn Jakobs er þróunin jákvæð á flestum sviðum samfélagsins og sveitarfélagið hafi lagt áherslu á að mæta þessari fjölgun með markvissri uppbyggingu. Mikilvægasti þátturinn í húsnæðisuppbyggingu bæjarins er nýtt íbúðahverfi, Víkurhverfi, sem hefur verið í þróun síðustu þrjú ár. Þar eru alls 34 íbúðaeiningar í byggingu eða þegar uppbyggðar, en 22 þeirra eru fullbúnar og íbúar fluttir inn. Brák íbúðafélag hefur þegar byggt 12 íbúðir sem leigðust allar strax út. Einnig hefur fyrirtækið Stólpi komið vel á veg í byggingu sinni á tíu íbúðareiningum. Jakob segir markmiðið með verkefninu vera að mæta aukinni eftirspurn eftir íbúðarhúsnæði vegna fjölgunar íbúa og að sérstaklega sé ánægjulegt að sjá ungt fólk byggja sér hús í hverfinu.

Sveitarfélagið hefur einnig lagt mikla áherslu á uppbyggingu skóla- og leikskólamála. Árið 2022 var tekin í notkun ný deild við leikskólann ásamt nýjum ungbarna leikvelli sem byggður var upp í kjölfarið. Á sama tíma hefur verið ráðist í miklar framkvæmdir við grunnskólann. Þegar Jakob tók við árið 2018 voru um 150 nemendur í grunnskólanum en í haust verða þeir orðnir tæplega 200. Til að mæta þessari þróun var byggð ný viðbygging við grunnskólann og önnur við íþróttahúsið. Samtals hefur um 350 fermetrum verið bætt við skóla- og tómstundaaðstöðu. Flutningshús voru keypt frá Reykjavík til að halda kostnaði niðri og telur Jakob að með þessum framkvæmdum hafi sveitarfélagið tryggt nægilegt húsrými fyrir næstu 20–30 árin ef þróunin heldur áfram með svipuðum hætti.

**Byggt var við Grunnskólann með færanlegum húsum**

Vöxtur byggist á fjölbreyttu atvinnulífi

Í atvinnumálum nefnir Jakob sérstaklega þangvinnslu á Hamraendum sem eitt mest spennandi framtíðarverkefni sveitarfélagsins. Um það var reyndar fjallað í grein í Skessuhorni í síðustu viku. Fyrirtækið þar hefur nú fengið tryggingu fyrir heitu vatni sem verður tengt í haust og segir Jakob að það muni lyfta starfseminni á nýtt stig og skapa fleiri störf. Hann telur að mikil tækifæri felist í áframvinnslu þangs og þara og að þessi atvinnugrein geti orðið mikilvæg fyrir samfélagið til framtíðar. Jakob bendir einnig á að þörungaiðnaðurinn geti að hluta tekið við af skelvinnslu sem áður var stór atvinnugrein í Stykkishólmi. Skelin hrundi skömmu eftir aldamót og hefur ekki enn náð sér að fullu. Vísindamenn hafa einkum kennt sýkingu um hrunið, þó sumir telji ofveiði einnig hafa átt þátt í því, hækkandi sjávarhiti eða annað.

Sveitarfélagið hefur jafnframt unnið markvisst að skipulagsmálum atvinnusvæða á Hamraendum og lagt grunn að frekari atvinnuuppbyggingu þar. Jakob rifjar upp að þegar sjávarútvegsfyrirtækið Ágústson lagði niður starfsemi sína árið 2021, þá hafi 31 starf tapast. Það hafi verið mikið áfall fyrir samfélagið enda fyrirtækið verið starfrækt í um 90 ár. Í kjölfarið fór sveitarfélagið í samstarf við Byggðastofnun og önnur sveitarfélög á Vesturlandi um verkefnið „Efling atvinnulífs“ til að styrkja atvinnulífið og milda áhrif lokunar fyrirtækisins. Mikilvægur þáttur í því var að tryggja með samstilltu átaki að aflahlutdeild fyrirtækisins héldist áfram í samfélaginu og að starfsfólk flyttist yfir til sjávarútvegsfyrirtækisins Þórsness.

**Þau eru litrík húsin sem búið er að reisa í Víkurhverfinu og búið í þeim öllum**

Ferðaþjónusta og sjávarútvegur

Jakob segir sjávarútveg enn vera einn af mikilvægustu atvinnuvegum sveitarfélagsins ásamt opinberri þjónustu. Sveitarfélagið og ríkið séu stórir atvinnurekendur á svæðinu, þó ríkisstöðugildum hafi fækkað undanfarin ár. Hann segir mikilvægt að standa vörð um opinbera þjónustu í bænum þar sem fækkun starfa hafi bein áhrif á þjónustu við samfélagið. Þórsnes sé lykilfyrirtæki í atvinnulífinu og hafi notið skelbóta sem tengjast skerðingu aflaheimilda þegar kvótakerfið var sett á sínum tíma. Jakob segir þessar skelbætur hafa skipt miklu máli fyrir áframhaldandi vinnslu og atvinnu í bænum.

Höfnin í Stykkishólmi gegnir einnig mikilvægu hlutverki í tekjuöflun sveitarfélagsins. Tekjur hafnarinnar byggja meðal annars á sjávarútvegi, smábátum, ferðaþjónustu, þ.m.t. starfsemi Sæferða og Baldurs. Jakob segir þó að Stykkishólmshöfn hafi orðið fyrir verulegu tekjutapi þegar innviðagjald var lagt á skemmtiferðaskip. Áður hafi 20–30 skemmtiferðaskip komið til Stykkishólms árlega en nú séu þau aðeins fjögur til sex. Ferðaþjónustan skiptir einnig gríðarlega miklu máli fyrir sveitarfélagið, ekki aðeins vegna þeirra starfa sem hún skapar heldur einnig vegna þeirra lífsgæða sem hún styður við í samfélaginu. Jakob bendir á að öflug ferðaþjónusta hafi jákvæð áhrif á fjölbreytni þjónustu í bænum, þar á meðal veitingastaði, verslun, menningu og afþreyingu sem nýtist bæði heimafólki og gestum. Þá styður ferðaþjónustan einnig við aðra atvinnustarfsemi í sveitarfélaginu, svo sem bakarí, smærri verslanir og ýmsa þjónustu. Að hans sögn er mikilvægt að sveitarfélagið sé virkur stuðningsaðili við það atvinnulíf sem byggist upp á hverjum tíma og stuðli þannig að áframhaldandi þróun þess og öflugu samfélagi.

Að lokum segir Jakob mannlífið í Stykkishólmi blómlegt og samfélagið öflugt. Unga fólkið sé að flytja aftur heim, fjölgun sé í leik- og grunnskólum og bæði íþrótta- og menningarstarf standi sterkt. Hann segir ánægjulegt að finna fyrir þeirri jákvæðni og þeim krafti sem sé í samfélaginu og að sífellt fleiri sjái tækifæri í því að búa og starfa í Stykkishólmi. Jakob telur Stykkishólm vera fjölbreytt og gott samfélag til að búa í þar sem öflug þjónusta og sterkt atvinnulíf fari saman. Hann segist bjartsýnn á framtíð sveitarfélagsins og sér fram á áframhaldandi ábyrga uppbyggingu og vöxt á næstu árum.

Mikil uppbygging í Stykkishólmi og stöðugur vöxtur

Áhersla verið lögð á uppbyggingu nýs íbúahverfis og leik- og grunnskóla

Áhersla verið lögð á uppbyggingu nýs íbúahverfis og leik- og grunnskóla