Vegagerðin hefur birt sérstaka tilkynningu vegna næturlokana Hvalfjarðarganga um hvítasunnu, sem jafnan er mjög stór ferðahelgi. Lokað verður aðfararnætur föstudags, mánudags og þriðjudags frá klukkan 21:30 til klukkan 6 að morgni. Ekki verður því lokað fyrir umferð aðfararnætur laugardags og sunnudags. Undanfarna tvo mánuði hefur verið unnið að endurnýjun ljósa í göngunum. Upphafleg verklok við endurnýjun ljósa var áætluð föstudaginn 29. maí og stefnir allt í að sú tímaáætlun muni standast.