Byrjað er að fræsa upp Stykkishólmsveg og þar með eru framkvæmdir hafnar við endurnýjun 3,4 kílómetra vegarkafla. Það er Borgarverk sem annast verkið, en fyrirtækið bauð lægst í útboði Vegagerðarinnar í febrúar. Áætlaður verkkostnaður var 274 milljónir króna en Borgarverk bæð 269 milljónir, eða 98,4% af kostnaðaráætlun. Byrjað var að fræsa frá Búðanesvegi og uppúr bænum en nú í sumar verður vegurinn endurbættur og breikkaður fram yfir Þingvallaafleggjara. Í verkinu felst fræsing, breikkun og styrking vegar, nýlögn ræsa og nýlögn á bundnu slitlagi. Gert er ráð fyrir að vegurinn verði átta metra breiður, með tveimur 3,5 m breiðum akbrautum og 0,5 m breiðum öxlum.