Í gær fór fram kynningarfundar vegna fyrirhugaðrar breytingar á deiliskipulagi Akratorgs vegna Suðurgötu 57, gamla Landsbankahússins. Fjölmenni sýndi kynningunni áhuga og var bæjarþingsalurinn við Dalbraut 4 þétt setinn. Án undantekninga lýstu gestir ánægju sinni með að hreyfing væri loks komin á endurbætur hússins en undanfarin ár hefur ástand þess versnað. Á fundinum var farið yfir drög að breytingum sem gera þarf á deiliskipulagi reitsins og á húsinu sjálfu. Áformað er að starfrækja hótel á annarri og þriðju hæð hússins, veitingastaður verði á jarðhæð, ásamt veislusal á fjórðu hæð en sú hæð verður nýbygging. Í kjallara er ráðgert að hafa iðnaðareldhús og geymslur. Í fyrrum peningageymslu bankans er ráðgert að verði aðstaða til líkamsræktar. Gert er ráð fyrir að koma 22 rúmgóðum herbergjum fyrir á miðhæðunum og að um hágæða hótel verði að ræða. Að lokinni kynningu gafst fundargestum kostur á að spyrja nánar út í verkefnið og koma á framfæri ábendingum í aðdraganda nýs skipulags.