Það verður áhrifamikil tónlistarveisla laugardaginn 18. apríl þegar Kór Akraneskirkju og Kór Keflavíkurkirkju flytja valda kafla úr rokksöngleiknum Jesús Kristur Súpergoð (e. Jesus Christ Superstar), verk sem hefur snert áheyrendur um heim allan með einstökum hætti þar sem tónlist, dramatík og áleitnar spurningar mætast.

Þótt kristni hér á landi hafi um árabil verið sögð í djúpri kreppu, kemur það stöðugt á óvart hversu órofa aðdráttaraflið í kringum persónu Jesú frá Nasaret heldur áfram. Hvernig væri annars hægt að skýra áhugann á verki eins og Jesus Christ Superstar, sem hefur frá áttunda áratugnum og fram á þennan dag notið sífelldra vinsælda.

Í hlutverkum Jesú og Júdasar stíga fram Eyþór Ingi Gunnlaugsson og Stefán Jakobsson, sem leiða flutninginn með kraftmikilli túlkun á örlagaríkum atburðum síðustu daga Jesú.

Íslensk textagerð og ný nálgun

Tónlist í verkinu er eftir Andrew Lloyd Webber, en íslenska textagerðin er í höndum Karls Ágústs Úlfssonar sem þýddi og staðfærði texta Tim Rice og tekst honum á áhrifaríkan hátt að færa þetta magnaða verk til íslenskra áhorfenda. 

Í þessari uppfærslu er ekki um að ræða heildarflutning söngleiksins heldur vel valda kafla sem draga fram kjarnann í verkinu – sterkustu tónlistaratriðin og dramatísk augnablik sem tengjast píslarsögunni.

Útsetningar eru í höndum Arnórs Vilbergssonar, sem hefur lagað verkið að þessum flutningi með áherslu á kraft kórsins og skýra framsetningu tónlistarinnar.

Mannleg saga sem lifnar við

Verkið byggir á píslarsögunni, frásögninni af síðustu dögum Jesú, en nálgast hana á mannlegan og nútímalegan hátt. Þar fá tilfinningar, efasemdir og innri togstreita að njóta sín, ekki síst í frá sjónarhorni Júdasar.

Túlkun Eyþórs Inga á Jesú dregur fram viðkvæmni og styrk í senn, á meðan Stefán Jakobsson gefur Júdasi áhrifaríka rödd sem undirstrikar dramatík verksins.

Sameinaður kraftur tveggja kóra

Kór Akraneskirkju og Kór Keflavíkurkirkju mynda saman öflugan hljóm. Kórarnir gegna lykilhlutverki í verkinu, þar sem þeir endurspegla mannfjöldann, samfélagið og hvernig almenningsálitið sveiflast frá því að upphefja og dýrka Jesú í að vilja svo afneita honum og dæma til dauða. Flutningurinn er undir stjórn Hilmars Arnar Agnarssonar og Arnórs Vilbergssonar, sem leiða verkið af öryggi og hafa næmni fyrir jafnvægi milli rokktónlistar og kórtónlistar.

Tónleikar sem tala til samtímans

Þótt verkið eigi rætur í fornum textum lifnar það við á nýjan hátt í þessum flutningi. Með því að draga fram valda kafla fær áhorfandinn þéttari og jafnvel áhrifameiri upplifun þar sem kjarninn í sögunni fær að njóta sín.

Þetta eru tónleikar sem sameina kraft tónlistar og dýpt sögunnar og sem rokksöngleikur fær verkið sérstakan slagkraft. Það er einmitt þessi samblanda, forn saga og nútímaleg tónlist, sem gerir tónleikana að einhverju meira en upprifjun á atburðum. Þeir verða að samtali við áhorfandann, þar sem hver og einn finnur sína eigin merkingu.

Í heild sinni verða þetta því ekki aðeins tónleikar, heldur spegilmynd – þar sem píslarsagan er ekki bara sögð, heldur endursköpuð í ljósi samtímans, með krafti rokksins að leiðarljósi.

Miðasala á tónleikana í Bíóhöllinni gengur vel en það eru enn til miðar á aukasýninguna kl. 14.00 á midix.is

Ingibjörg Ólafsdóttir