Nú þegar hrygningarstoppið stendur sem hæst er opið svæði til steinbítsveiða línubáta við Látrabjarg. Þar hafa línubátar af Snæfellsnesi mokfiskað af steinbít að undanförnu en togarar verið aðeins vestar og gert það sömuleiðis gott.

Magni Aðalsteinsson, aðstoðarframkvæmdastjóri Fiskmarkaðs Snæfellsbæjar, segir að um leið og mikið berst af steinbít lækki verð mikið. Á föstudag var meðalverð um 230 krónur fyrir kílóið en í gær var verðið komið niður í 152 krónur. Reiknaði Magni með að verð á steinbít fari neðar strax í dag, þar sem von var á togurum til löndunar í Grundarfirði. Magni sagði einnig að Atlandic Seafood kaupi allan steinbít á markaðinum þar sem steinbíturinn er slægður og síðan seldur víða um heim.

Tryggvi Eðvarðs SH landaði í gær 30 tonnum, Kristinn SH 22 tonnum og á laugardagskvöldið landaði Lilja SH 18 tonnum af steinbít.

Mikill vinna leggst á sjómenn beitningarvéla bátanna við að veiða steinbítinn þar sem hann slítur króka af línunni og því þurfa sjómenn að bæta þúsundum króka á. Er línan þar af leiðandi ekki dregin mjög hratt inn líkt og á þorsk- og ýsuveiðum.

**Svavar Kristmundsson á Kristni SH kátur við löndum**

**Mikið þarf að bæta á línuna og krókar út um allt á fiskkörum**

**Kort af svæðinu sem hrygningarstoppið nær yfir**

Mokveiði af steinbít og lækkandi verð