Í gærkveldi komu félagar í Lionsklúbbi Akraness saman í matsal Heilbrigðisstofnunar Vesturlands á Akranesi. Auk hefðbundinna fundarstarfa var nælt gullmerki í barm Viktors Björnssonar klúbbfélaga. Lionsklúbburinn afhenti Heilbrigðisstofnun Vesturlands veglegar gjafir við þetta tækifæri. Að þessu sinni var gefið Schiller hjartalínuritstæki, Siemens blóðrannsóknatæki, Mach 130 F færanleg vinnuljós og búnaður til aðgerða á blöðruhálskirtli. Heildarvermæti þessara gjafa er um 6,3 milljónir króna.

Jóhanna Fjóla Jóhannesdóttir forstjóri og Hulda Gestsdóttir framkvæmdastjóri hjúkrunar tóku við gjöfunum fyrir hönd HVE. Þórir Bergmundsson læknir og Lionsfélagi lýsti notagildi þeirra tækja sem gefin voru. Jóhanna Fjóla sagði ómetanlegan stuðning Lionsklúbbsins í gegnum tíðina, eða allt frá stofnun hans fyrir tæpum sjö áratugum. Undanfarin tíu ár hefur klúbburinn fært sjúkrahúsinu ýmsan búnað fyrir tæpar fjörutíu milljónir króna, tæki til lækninga og þjónustu við sjúklinga. Klúbburinn hefur því verið í hópi dyggustu styrktaraðila HVE. „Sá stuðningur er ómetanlegur fyrir HVE og samfélagið allt,“ sagði Jóhanna Fjóla.

**Viktor Björnsson var sæmdur gullmerki Lionsklúbbs Akraness, sem Guðjón Viðar nældi í barm hans.**

Lionsklúbbur Akraness gefur til sjúkrahússins