Veðurstofa Íslands hefur gefið út gular viðvaranir vegna storms og hríðarveðurs víða um land seint í kvöld og í nótt á Breiðafirði og miðhálendinu, á Suðurlandi, Faxaflóa og Ströndum. Hvassviðri eða stormur með vindhraða á bilinu 13-20 m/s með hvössum vindstrengjum verður við fjöll á Suðurlandi og má búast við talsverðri eða mikilli snjókomu, lélegu skyggni og versnandi aksturskilyrðum, einkum á Hellisheiði og í Þrengslum. Lokanir á vegum eru líklegar.

Á Faxaflóa og Breiðafirði er spáð hvassviðri eða stormi með vindhraða á bilinu 15-23 m/s og mjög hvössum vindstrengjum við fjöll sem staðbundið geta farið yfir 30 m/s, einkum við Kjalarnes, Hafnarfjall og á sunnaverðu Snæfellsnesi. Búast má við talsverðri eða mikilli snjókomu eða éljagangi með skafrenningi og takmörkuðu eða lélegu skyggni og versnandi akstursskilyrðum, einkum á Mosfellsheiði og á sunnanverðu Snæfellsnesi. Líkur eru á samgöngutrufunum og lokunum á vegum. Fólki er bent á að sýna varkárni og fylgjast með veðurspám.

Svipað er uppi á teningnum á Ströndum og Norðurlandi vestra, hvassast sunnantil og á Tröllaskaga. Þar geta vindhviður við fjöll farið yfir 35 m/s. Sömu sögu er að segja um Norðurland eystra, en þar verður hvassast sunnan- og vestantil. Á báðum þessum stöðum er varhugavert fyrir vegfarendur með aftanívagna eða á ökutækjum sem taka á sig mikinn vind að vera á ferðinni. Afmarkaðar samgöngutruflanir líklegar og fólk er hvatt til að ganga frá lausum munum. Austurland að Glettingi verður ekki undanskilið þessu veðri og gengur ekki niður fyrr en um hádegisbil á morgun.

Ljósm/Veðurstofa Íslands – Spáð er vonskuveðri víða á landinu í nótt og á morgun.

Enn ein lægðin – færð og veður næsta sólarhringinn