Aðalfundur Kjalar, stéttarfélags starfsmanna í almannaþjónustu, fór fram á Akureyri og í streymi 26. mars sl. Farið var yfir starfsemi félagsins á liðnu ári og helstu verkefni fram undan. Á fundinum fóru fram stjórnarskipti. Arna Jakobína Björnsdóttir fór yfir skýrslu stjórnar og kom fram í ræðu hennar að starf félagsins einkenndist af öflugri réttindabaráttu, markvissri þjónustu og áframhaldandi eflingu félagsins. Í lokaorðum sínum lagði hún áherslu á mikilvægi samstöðu og að félagið væri fyrir félagsfólkið: „Stéttarfélag er fólkið sjálft – samstaða þess og vilji til að standa saman þegar á reynir. Ég er ánægð með það sem hefur áunnist og óska félaginu og þeim sem taka við alls hins besta í framtíðinni.“ Hulda Guðmundsdóttir nýr formaður Kjalar sleit fundi og sagði: ,,Ég hlakka mikið til að taka þetta hlutverk að mér, vinna með ykkur og halda áfram að byggja upp sterkt og öflugt stéttarfélag fyrir Kjalar fólk.“