Júlíönuhátíð fór fram í þrettánda sinn í Stykkishólmi dagana 19.-21. mars og tókst afar vel. Hátíðin, sem hefur fest sig í sessi sem einn af helstu menningarviðburðum Vesturlands, bauð upp á fjölbreytta dagskrá þar sem bókmenntir, tónlist og myndlist voru í forgrunni.

Þema hátíðarinnar í ár var helgað Jónasi Hallgrímssyni. Leshópar, sem hafa hist reglulega frá áramótum, lásu skáldsöguna Ferðalok eftir Arnald Indriðason og samhliða þeim lestri lásu þau ævisögu Jónasar eftir Pál Valsson. Á lokadegi hátíðarinnar komu leshópar saman á Narfeyrarstofu þar sem bækurnar voru ræddar í sameiningu, meðal annars í samtali við höfund ævisögunnar.

Meðal dagskrárliða var opnun myndlistarsýningarinnar Eyjalíf í Norska húsinu, þar sem sýnd voru vatnslitaverk eftir Reyni Vilhjálmsson af eyjum Breiðafjarðar. Þá vakti frásögn Melkorku Teklu Ólafsdóttur, brottflutts Hólmara, um æsku sína í Stykkishólmi athygli gesta og veitti innsýn í samfélag bæjarins.

Tónlist skipar ávalt stóran sess á hátíðinni og engin undantekning á því í ár. Ungt tónlistarfólk úr Stykkishólmi opnaði hátíðina og vakti athygli fyrir hæfileika og framkomu. Þá voru tónleikar Ragnheiðar Gröndal og Guðmundar Péturssonar einn af hápunktum dagskrárinnar, þar sem flutt voru ýmis lög, meðal annars við ljóð Júlíönu Jónsdóttur og áheyrendur tóku þátt í samsöng.

„Það er eitthvað alveg sérstakt sem gerist þegar fólk á öllum aldri kemur saman og deilir menningu, sögum og tilfinningum. Þá verður til eitthvað sem er meira en bara dagskrá. Þar verður samfélagið til,“ sagði þátttakandi í leshópi hátíðarinnar

Hátíðinni lauk með sameiginlegum samsöng undir stjórn Jóseps Blöndal og Lárusar Ástmars Hannesarsonar. Að venju voru veittar viðurkenningar fyrir framlag til menningar- og samfélagsmála í Stykkishólmi. Í ár hlutu þau Anna Melsteð og Jósep Blöndal þann heiður.

Gréta Sigurðardóttir hefur skipulagt hátíðina frá upphafi. Í ár stóð hún einnig að endurútgáfu ljóðabóka Júlíönu Jónsdóttur, Stúlka og Hagalagðar, í tilefni þess að 150 og 110 ár eru liðin frá útgáfu þeirra. Júlíönuhátíð hefur á undanförnum árum verið mikilvægur vettvangur fyrir menningu og samveru í Stykkishólmi og dregur fram fjölbreytt mannlíf bæjarins þar sem fólk á öllum aldri kemur saman. Slíkir viðburðir undirstrika mikilvægi menningar og lista í samfélaginu, ekki aðeins sem afþreyingar heldur sem grunnþáttar í lífsgæðum, tengslamyndun og samfélagsvitund.

Þar sem samfélagið verður til