Þrek- og aflraunamót á vegum Ultraform og ÍA á Akranesi

Líkamsræktarstöðin Ultraform var stofnað af hjónunum Sigurjóni Erni Sturlusyni og eiginkonu hans, Simonu Vareikaité, í bílskúr á heimili þeirra hjóna í Reykjavík 28. júni 2020. Sigurjón Ernir er frá Hnúki í Hvalfjarðarsveit en eiginkona hans kemur frá Frakklandi.

„Við byrjuðum á Kirkjustéttinni í Grafarholti, í bílskúrnum heima hjá mér með 5-6 einstaklingum sem ég var að þjálfa á þeim tíma. Fljótlega hafði myndast um 15-16 manna hópur. Ultraform hefur stækkað mjög hratt á skömmum tíma,“ segir Sigurjón í samtali við Skessuhorn. „Síðan settum við upp aðra stöð á Ægisbraut 29 á Akranesi um miðjan september 2021. Fyrir einu og hálfu ári flutti Ultraform síðan í nýja stöð að Gylfaflöt 10 í Grafarvogi. Við fórum úr 100 fermetrum í 400 og þetta hefur bara sprungið út! Utanvegasenan og hlaupasenan er orðin svo stór hérna á Íslandi. Þú finnur ekki lausa helgi yfir sumarið,“ segir Sigurjón.

Áherslan á þjálfun hjá Ultraform er á alhliða hreystiþjálfun eins og úthald, styrkur og snerpa. „Í boði er frí prufuvika hjá Ultraform og er þjálfunin miðuð fyrir alla, óháð formi. Síðan eru hópatímar þar sem þjálfari stjórnar upphitun, aðalþætti og niðurlagi æfingatímans sem stendur yfir í klukkutíma, með megin áherslu á blandaðar æfingar í úthaldi og styrk. Iðkandinn ræður þyngdinni sjálfur, ákefðinni á tækjunum og taka æfingar mið af getu hvers og eins. Ultraform er líka með hlaupahóp þar sem allir áskriftarmeðlimir geta tekið þátt sér að kostnaðarlausu. Góð alhliða þjálfun, styrkleiki, hraði og úthald eru grunnstoðir góðrar heilsu,“ segir Sigurjón.

Paraþrekmót fram undan

8×8 Paraþrekmót Ultraform og ÍA verður haldið laugardaginn 28. mars í Akraneshöllinni. Keppnin er parakeppni í þetta skiptið þar sem keppt verður í karla-, kvenna- og blönduðum flokki (tveir aðilar keppa saman). Parið hleypur alltaf saman þrjá hringi inni í Akraneshöllinni (1 km) áður en þau fara á æfingastöðvar og samanstendur mótið af átta eins kílómetra hlaupum og átta þrek- og styrktaræfingum. Í grunninn heitir þetta keppnisform Hyrox og hófst fyrir átta árum.

Akranesmótið er okkurs konar „eftirlíking“ af Hyrox mótum sem eru haldin innan húss um allan heim, í stórum höllum líkt og Akraneshöllinni. Um er að ræða þrek- og aflraunamót fyrir alla, allt frá atvinnu-íþróttafólki yfir í þá sem fara sér hægar yfir. Mót var haldið á dögunum í London sem stóð yfir í 4-5 daga og 20 þúsund manns tóku þátt. Mótið í Akraneshöllinni hefst klukkan 09:30 og lýkur á tímabilinu klukkan 14-15. Að móti loknu verður verðlaunaafhending fyrir aldurshópa og fyrir/hröðustu fyrstu pörin í öllum flokkum. Sjón er sögu ríkari! Stúka er staðsett í Akraneshöllinni og er fólk hvatt til að koma og styðja við keppendur. ÍA verður einnig með sjoppu opna fyrir keppendur jafnt sem áhorfendur og allir keppendur fá frítt í sund í Jaðarsbakkalaug eftir átökin. Skráning er opin á vef Ultraforms til sunnudagsins 22. mars.

**Aflraunamaðurinn Sigurjón Ernir í miklum ham.**

Styttist í Akrafjall Ultra

Á sjálfan kosningadaginn í vor, laugardaginn 16. maí, fer utanvegahlaupið Akrafjall Ultra fram í sjötta sinn. Ultraform skipuleggur hlaupið með dyggum stuðningi Akraborgar. Allar vegalengdir gefa ITRA stig og eru er því viðurkennd sem forhlaup fyrir t.d. Laugavegshlaupið. „Þetta er aðgengilegt hlaup fyrir flesta sem vilja prófa utanvegahlaup nálægt höfuðborgarsvæðinu. Hlaupið hefst hjá Ultraformi á Ægisbraut 29 en því lýkur í Akraneshöllinni. Akrafjall Ultra hefur þróast í gegnum árin og verður nú í fyrsta sinn boðið upp á krakkahlaup – eins kílómetra hlaup fyrir 3-12 ára börn sem hefst klukkan 14:00 fyrir utan Akraneshöllina. Svona stór hlaup gera heilmikið fyrir bæinn og allir geta tekið þátt,“ segir Sigurjón Ernir.

Með meira krefjandi hlaupum

Blaðamanni lék forvitni á að vita hvert erfiðleikastigið á Akrafjalli Ultra hlaupinu er miðað við önnur hlaup. „Það breytist mikið í takt við vegalengdina sem hlaupin er. Akrafjall Ultra er með meiri krefjandi hlaupum á Íslandi, sérstaklega þegar farnir eru 27 eða 46 kílómetrar sem að þessu sinni er lengri vegalengd en verið hefur. Núna verður farið upp og niður fjallið tvisvar sinnum, flati fyrir og flati eftir – og hækkuninn er 2.100 metrar. Það tekur meira úr þér að hlaupa niður, það er það sem að eyðileggur leggina. 20 og 27 kílómetrarnir eru frábær æfingahlaup fyrir Laugaveginn og Súlurnar,“ segir Sigurjón.

Að sögn Sigurjóns Ernis hefur undirbúningur fyrir mótið gengið vel og stefnir í metþátttöku í ár. Í fyrra voru þátttakendur 560 og árið þar á undan 300. Nú eru um 700 þátttakendur skráðir til leiks. „Ef fleiri gistimöguleikar væru á Akranesi væri auðveldlega hægt að halda stærra hlaup með um 1000-1500 keppendum og mörg hliðarstörf gætu komið til ef hægt væri að taka á móti fleiri erlendum þátttakendum og ferðamönnum. Möguleikarnir eru því miklir,“ segir Sigurjón Ernir.

**Kort af krakkahlaupinu í ár, en hlaupið er kringum æfingasvæðið. Akrafjall Ultra er orðið að fjölskyldumóti.**

**Ný vegalengd á þessu ári í Akrafjall Ultra – 46 kílómetrar.**

**Sigurjón Ernir, yfirþjálfari Ultraforms, í góðum gír í Kerlingarfjöllum.**

Ultraform á Akranesi vex fiskur um hrygg

Þrek- og aflraunamót á vegum Ultraform og ÍA á Akranesi

Þrek- og aflraunamót á vegum Ultraform og ÍA á Akranesi