Íslandsmót unglinga í keilu var haldið helgina 14. og 15. mars í Egilshöll í Reykjavík. Þar átti ÍA fjóra fulltrúa.

**Davíð Þór Birgisson Íslandsmeistari í 3. flokki.**

Í 5. flokki pilta keppti Tristan Freyr Birgisson og stóð sig með prýði og náði 865 pinnum í átta leikjum og var næst hæstur, en allir í þessum flokki fá viðurkenningu fyrir þátttöku. Í 3. flokki pilta keppti bróðir hans Davíð Þór Birgisson sem hlaut gullverðlaun og titilinn Íslandsmeistari og náði 1035 pinnum eftir átta leiki. Í 2. flokki stúlkna keppti Dagbjört Ósk Valdimarsdóttir. Í 2. flokki þurfa keppendur að spila sex leiki hvorn dag og náði Dagbjört 1570 pinnum í 12 leikjum og dugði það henni í 3. sæti.

**Matthías Leó Sigurðsson er tvöfaldur silfurverðlaunahafi eftir mótið.**

Í 1. flokki pilta var Matthías Leó Sigurðsson með 2421 pinna eftir 12 leiki sem var rúmum 100 pinnum á undan næsta manni. Í 1. flokki voru spiluð úrslit og spilaði Matthías til úrslita um 1. sæti en þurfti því miður að lúta í lægra haldi fyrir Tristan Frey Nínusyni ÍR og hlaut Matthías því silfur. Með sínum góða árangri náði Matthías þeim rétti að keppa um 1. sæti í Opnum flokki og háði þar baráttu við Svavar Stein Guðjónsson ÍR og varð aftur að lúta í lægra haldi fyrir andstæðingnum en tvö silfur er ekki slæmt og hæsta skor fyrir úrslitakeppni bæði í eigin flokki og opnum flokki segir sitt um getu. Matthías stundar nám á Afreksbraut Fjölbrautaskóla Vesturlands. „Keilufélagið er stolt af sínu fólki sem er í mikilli framför. Þjálfarar barnanna eru Ólafur Sveinn Ólafsson, Guðmundur Sigurðsson og Jónína Björg Magnúsdóttir,“ segir í tilkynningu.

Keilufólk ÍA náði góðum árangri á Íslandsmóti unglinga