Ónotuð hjúkrunarrými á Brákarhlíð má rekja til brogaðs stjórnkerfis öldrunar- og heilbrigðismála

Brýn þörf er fyrir hjúkrunarrýmum í landinu eins og margoft hefur komið fram í fjölmiðlum. Notað er orðið fráflæðisvandi vegna aldraðs fólks sem teppir stofur og ganga bráðadeildar sjúkrahússins. Fólk fær ekki inni á hjúkrunarheimilum. Sterkar vísbendingar eru um að vandamálið sé að minnsta kosti að hluta til kerfislægt, þ.e. að hjúkrunarrými séu til, en ekki nýtt. Ríkissjónvarpið fjallaði um málið í kvöldfréttum á mánudaginn og heimsótti hjúkrunar- og dvalarheimilið Brákarhlíð í Borgarnesi. Í framhaldi af þeirri umfjöllun skrifaði Inga Dóra Halldórsdóttir framkvæmdastjóri Brákarhlíðar pistil á síðu heimilisins þar sem hún útskýrir kerfislægan vanda. Gefum Ingu Dóru orðið:

„Það er kunnara en frá þurfi að segja hversu brýn þörf er á hjúkrunarrýmum um allt land og það á við um þjónustusvæði Brákarhlíðar. Enginn biðlisti er eftir dvalarrýmum en langur biðlisti eftir hjúkrunarrýmum. Þessi þróun var fyrirséð fyrir mörgum árum og því hafa stjórn og stjórnendur Brákarhlíðar unnið hörðum höndum að því árum saman að laga starfsemina að breyttri þörf til að geta fullnýtt getu stofnunarinnar í þágu íbúa á okkar þjónustusvæði.“

Inga Dóra skrifar að til að þessi markmið náist þurfi vilja stjórnvalda og heimild þeirra til breytinga. „Samanlagt eru í dag 58 rými á Brákarhlíð og var skiptingin, samkvæmt samningi við Sjúkratryggingar Íslands sem rann út um síðustu áramót, þannig að það voru 37 varanleg hjúkrunarrými, níu biðhjúkrunarrými, tvö tímabundin almenn hjúkrunarrými og tíu dvalarrými. Í maí í fyrra var óskað eftir því við stjórnvöld að öllum 17 dvalarrýmum yrði breytt varanlega í hjúkrunarrými enda er þjónustuþörfin þar, sem fyrr segir.“

Þá skrifar Inga Dóra að nú þegar tíu mánuðir eru liðnir frá því að erindið var sent heilbrigðistráðuneytinu hefur fullnaðarheimild þar um enn ekki fengist. „Vert er að fram komi að á þessum tíma hafa losnað dvalarrými sem hafa staðið tímabundið auð þar sem enginn biðlisti er um dvalarrými og ekki er hægt að nýta þau sem hjúkrunarrými án heimildar þar um. Einmitt af þessum ástæðum hafa stjórnendur Brákarhlíðar brýnt heilbrigðisyfirvöld í að veita svör og koma þannig í veg fyrir að rými standi auð þegar fjöldi fólks bíður eftir að fá þjónustu. Í þessu samhengi er sömuleiðis ástæða til að taka fram að allur aðbúnaður á Brákarhlíð er með þeim hætti að auðvelt og kostnaðarlítið er að breyta dvalarrýmum í hjúkrunarrými.“

Inga Dóra bendir á að sú breyting var gerð í stjórnsýslu heilbrigðis- og öldrunarmála við síðustu stjórnarmyndum að málefni dvalarrýma voru færð frá heilbrigðisráðuneyti til félagsmálaráðuneytis. Eftir sem áður eru málefni hjúkrunarrýma hjá heilbrigðisráðuneyti. „Í baráttu Brákarhlíðar fyrir umræddum breytingum höfum við fundið með skýrum hætti að þessi kerfisbreyting er ekki til þess fallin að auka skilvirkni í öldrunar- og heilbrigðismálefnum. Þvert á móti.“

Að endingu skrifar Inga Dóra: „Stjórn og stjórnendur Brákarhlíðar undirstrika af þessu tilefni þá kröfu að stjórnkerfi öldrunar- og heilbrigðismála bregðist hraðar við beiðnum sem þessum svo að aldrei komi upp sú staða að þjónusturými sé ekki hægt að nýta vegna tafa á afgreiðslu mála í kerfinu. Þeir sem gjalda fyrir það er fólk í brýnni þörf fyrir þjónustu.“

**Inga Dóra Halldórsdóttir framkvæmdastjóri Brákarhlíðar. Ljósm. Skessuhorn/gj**

Kerfið vinnur gegn markmiðum sínum

Ónotuð hjúkrunarrými á Brákarhlíð má rekja til brogaðs stjórnkerfis öldrunar- og heilbrigðismála

Ónotuð hjúkrunarrými á Brákarhlíð má rekja til brogaðs stjórnkerfis öldrunar- og heilbrigðismála