segir forstjóri Elkem – Landsvirkjun segist ekki mega niðurgreiða rafmagn

Verð á raforku þarf að lækka, flutningskostnaður er of hár og óvissa er um nægt framboð af raforku. Þetta er mat forstjóra Elkem á Íslandi. Þetta skekki samkeppnishæfni Íslands og því gæti þurft að loka Járnblendiverksmiðju Elkem á Grundartanga á næstu árum. Talsmaður Landsvirkjunar segir að ekki megi ekki selja rafmagn undir kostnaðarverði, vegna samkeppnislaga í landinu enda engin ástæða til.

„Ég var spurð á Iðnþingi hver yrði versta niðurstaðan ef ekkert breyttist í samkeppnisumhverfinu og þá sló ég þessari staðreynd fram,“ segir Álfheiður Ágústsdóttir forstjóri Elkem í samtali við Skessuhorn. „Auðvitað vona ég að til þess þurfi ekki að koma, en þetta er ákall um að við sameinum krafta til að ræða lausnir og skapa fyrirsjáanleika til framtíðar. Starfsmenn skipta auðvitað lykilmáli. Við byggjum okkar styrk á sérfræðiþekkingu, reynslu og ómetanlegu framlagi þeirra sem starfa í verksmiðjunni og launin eru líka hæst í samanburði við aðrar verksmiðjur í Elkem samstæðunni. Það er mannauðurinn sem gerir okkur kleift að keppa á alþjóðamarkaði. Til að tryggja framtíðaröryggi þessara starfa þurfum við að bæta samkeppnisskilyrðin í landinu.“

Aðstæður fyrir langtímaákvarðanir

Álfheiður segir að undanfarna tvo áratugi hafi Ísland verið að glata hluta sterkrar samkeppnisstöðu sem það hafði áður á alþjóðavísu. „Nú er tækifærið til að snúa þeirri þróun við. Með því að huga að raforkuverði, flutningskostnaði og tryggu aðgengi að orku á samkeppnishæfu verði getum við skapað aðstæður þar sem hægt er að taka upplýstar og traustar langtímaákvarðanir. Skýrt regluverk, fyrirsjáanleiki og stöðugleiki eru lykilatriði fyrir fjárfestingar og áframhaldandi uppbyggingu og þar með fyrir framtíð starfsmanna sem treysta á þessi störf.“

Hún segir enn fremur flókið að þurfa að greiða verndartolla inn á Evrópumarkaði en á sama tíma lúta öllu regluverki ESB með tilheyrandi kostnaði. „Ef það verður áframhaldandi óvissa um aðgang að innri markaði Evrópu hefur það áhrif á vilja til fjárfestinga hér á landi.“

Stóriðjan er mikilvæg fyrir landsbyggðina

Hún segir að fyrirtækið skipti miklu máli fyrir íslenska hagkerfið enda sé útflutningsverðmætið um 30 milljarðar króna. Þá sé stóriðjan mjög mikilvæg fyrir landsbyggðina. „Áhrifin yrðu gríðarleg á Vesturlandi ef fyrirtækið þyrfti að loka. Hátekjustörfum myndi fækka og lokunin hefði bæði bein og óbein áhrif á vinnumarkaðinn. Tekjur sveitarfélaga myndu minnka og það hefði áhrif á þjónustu við íbúa. Hundruð starfsmanna leggja metnað sinn, fagmennsku og lífsviðurværi í störf sín á Grundartanga. Að tryggja samkeppnishæfni Íslands er því ekki aðeins hagfræðilegt heldur líka verkefni sem snertir líf og framtíð fólks. Það er því mikið í húfi – en líka mikið tækifæri en til þess þarf Ísland að vera samkeppnishælt, svo atvinnulíf á landsbyggðinni dafni,“ segir Álfheiður.

Þóra Arnórsdóttir, talsmaður Landsvirkjunar, segir að það sé hlutverk þeirra að ná fram sem hæstu orkuverði og hámarka þannig verðmæti þeirra auðlinda sem Landsvirkjun sé trúað fyrir. „Landsvirkjun má ekki selja rafmagn undir kostnaðarverði vegna samkeppnislaga í landinu, enda engin ástæða til. Þegar búið er að nýta hagkvæmustu orkukostina þýðir það einfaldlega að orkuverð mun hækka. Ríkisstjórnin hefur sagt það mjög skýrt að ekki megi niðurgreiða orku til stórnotenda eins og þekkist í Noregi en þar er raforkuverðið sambærilegt en helmingurinn síðan niðurgreiddur af stjórnvöldum.“

Þóra segir að Landsvirkjun taki undir með Álfheiði um nauðsyn þess að halda flutningskostnaði í skefjum. Á þeim 60 árum sem Landsvirkjun hafi starfað hafi oft verið tekist hart á um orkuverð í samningaviðræðum við stór alþjóðleg fyrirtæki sem hafi valið að byggja upp starfsemi hér á landi. „Við stefnum að því að ná samningum við Elkem, hvort það tekst ræðst meðal annars af aðstæðum á kísilmörkuðum. Niðurstaðan ræðst hinsvegar við samningaborðið ekki í fjölmiðlum.“

„Hátt raforkuverð skekkir samkeppnisstöðu Íslands“

segir forstjóri Elkem - Landsvirkjun segist ekki mega niðurgreiða rafmagn

segir forstjóri Elkem - Landsvirkjun segist ekki mega niðurgreiða rafmagn