Guðlaugur Antonsson eftirlitsmaður hjá Matvælastofnun segir að dæmi séu um að útigangshross hafi í frostaköflum að undanförnu ekki haft nægan aðgang að vatni. Hann skrifar til félagsmanna í hmf. Borgfirðingi: „Ágætu félagar, því miður sýnist mér vera að raungerast það sem ég óttaðist. Það er að í einhverjum tilfellum hafi hesteigendur með hross á útigangi ekki passað nógu vel upp á að þau hefðu nóg vatn í þessum langa frostakafla sem var og engin snjór á jörðu.“

Helstu mælikvarðar á velferð hrossa eru holdafar og heilbrigði en auk þess er litið til atferlis og upplits hrossanna. Samræmt mat á holdafari er byggt á holdastigunarkvarða sem þróaður hefur verið fyrir íslenska hestinn og góð reynsla er komin á. Guðlaugur skrifar: „Ég er því miður að koma að hrossum sem komin eru núna niður í holdastig 2,5 og jafnvel 2,0 í einstaka tilfellum. Mögulega væri 2,5 í lagi ef komið væri framundir mánaðamót apríl/maí við góðar aðstæður en 2,0 eða lakara er aldrei ásættanlegt.“

Þá segir Guðlaugur að einkum, eins og kannski eðlilegt er, eru þetta folaldshryssur sem eru að mjólka folöldum eða fylfullar hryssur og auðvitað hvorttveggja í mörgum tilfellum. „En hvað er til ráða þegar svona er komið? Hugið að hrossunum, takið undan hryssum sem orðnar eru tæpar í holdum og takið jafnvel frá hross sem núna eru í 2,5 eða lakari og fóðrið sér og mjög vel! En svo því sé til haga haldið þá kem ég líka að fjölda geldhrossa sem eru allt of feit svo til vandræða horfir varðandi heilsufar, sykursýki/hófsperra, og svo líka í mörg stóð sem eru bara í ljómandi standi, í passlegum holdum og vel hirt með góða beit og fóður eftir þörfum!“