Jöfnunarsjóður sveitarfélaga hefur hafnað beiðni Samstarfsnefndar um sameiningu Borgarbyggðar og Skorradalshrepps, frá 5. desember 2025, þar sem óskað var eftir auknu framlagi vegna kostnaðar sem hlotist hefur af undirbúningi tillögu um sameiningu sveitarfélaganna. Í erindinu kom fram að heildarkostnaður vegna starfa nefndarinnar, kynningar á sameiningartillögunni ásamt undirbúningi og framkvæmd atkvæðagreiðslu hafi numið alls 40,1 milljón króna. Eins og fram hefur komið var sameining sveitarfélaganna samþykkt í báðum sveitarfélögum í september síðastliðnum.

Jöfnunarsjóður hafði áður greitt framlag að fjórhæð 25,7 milljónir króna vegna sameiningarviðræðnanna. Samkvæmt vinnureglum um úthlutun framlaga vegna sameiningarmála eiga sveitarfélögin rétt á undirbúningsframlögum Jöfnunarsjóðs að heildarfjórhæð 27,7 milljónir. Að lokinni umfjöllun Jöfnunarsjóðs samþykkti nefndin að leggja til við ráðherra að veitt yrði framlag úr sjóðnum samkvæmt útreikningum vinnureglna að frádregnu því framlagi sem þegar hefur verið greitt. Í samræmi við það verða greiddar tvær milljónir króna í viðbótarframlag. „Heildarframlög Jöfnunarsjóðs sveitarfélaga vegna undirbúningsvinnu við sameiningu Borgarbyggðar og Skorradalshrepps nema því samtals 27,7 m.kr.“ Byggðarráð Borgarbyggðar bókaði á fundi sínum síðastliðinn fimmtudag vonbrigði með afgreiðslu Jöfnunarsjóðs, enda vantar 12,4 milljónir króna upp á að greiddur verði útlagður kostnaður vegna málsins. Taldi byggðarráð það vart samræmast fyrri afgreiðslum sjóðsins varðandi sama mál eða sambærileg mál. Upplýst var á fundinum að unnið væri að nýju erindi til sjóðsins í von um að afstaðan verði endurskoðuð.

Jöfnunarsjóður hafnar greiðslum alls kostnaðar við sameiningu